ზუგდიდის ინფექციური საავადმყოფოს ლაბორატორიაში COVID 19-ზე 25 ადამიანის ბიოლოგიური მასალა გამოიკვლიეს, ყველა შემოწმებულ ტესტზე პასუხი უარყოფითია. ამის შესახებ ინფორმციას ზუგდიდის ინფექციური საავადმყოფო ავრცელებს.
მათივე ინფორმაციით,25 შემოწმებული პაციენტიდან 8 სამედიცინო პერსონალია. დანარჩენები კი „ცხელების ცენტრებსა“ და საკარანტინო სივრცეში მყოფი პირები არიან.
ინფექციური საავადმყოფოს ლაბორატორიული მიმართულების ხელმძღვანელის, ლელა ქაჯაიას განცხადებით, 2 მაისიდან ლაბორატორია სრული დატვირთვით იმუშავებს.
"უკვე ზეგიდან ჩვენ სრული დატვირთვით ვიმუშავებთ, რადგან მივიღებთ ჩინეთიდან გამოგზავნილ რეაქტივებს, რაც საშუალებას მოგვცემს უფრო მეტ ადამიანს ჩავუტაროთ ტესტირება. ექიმების შემდეგ PCR ტესტირება ჩაუტარდებათ სამხედრო მოსამსახურეებს, პოლიციელებსა და რეგიონში მომუშავე ჟურნალისტებს", -ამბობს ლელა ქაჯაია.