მცხეთა-მთიანეთის სახელმწიფო რწმუნებულმა ჯანდაცვის სექტორის რეგიონულ წარმომადგენლებთან მორიგი სამუშაო შეხვედრა გამართა. ამის შესახებ ინფორმაციას მცხეთა-მთიანეთის სახელმწიფო რწმუნებულის ადმინისტრაცია ავრცელებს.

მათივე ინფორმაციით, შალვა კერესელიძემ, შეხვედრის მონაწილეებთან ერთად, კორონავირუსის პრევენციის მიზნით, უახლოეს დღეებში გასატარებელი ზომები განიხილა.

სახელმწიფო რწმუნებულის აპარატის განმარტებით, ერთ-ერთ მნიშვნელოვან ღონისძიებას მცხეთა-მთიანეთის მოსახლეობის თერმოსკრინინგი წარმოადგენს, შესაბამისად, უკვე შეიქმნა შესაბამისი ჯგუფები, რომლის წევრები, ეტაპობრივად, რეგიონში მცხოვრებ თითოეულ მოქალაქეს თერმო სკრინინგის პროცედურას ჩაუტარებენ და საჭიროების შემთხვევაში სათანადო დახმარებას აღმოუჩენენ. ჯგუფები სამედიცინო პერსონალით, თვითმმართველობების წარმომადგენლებითა და მოხალისეებით არის დაკომპლექტებული. შეხვედრის ფარგლებში, მხარის სახელმწიფო რწმუნებულმა სამედიცინო დაწესებულებებში არსებული ვითარების შესახებაც მიიღო ინფორმაცია. როგორც მცხეთა-მთიანეთის სახელმწიფო რწმუნებულის ადმინისტრაციაში აცხადებენ, რეგიონის სამედიცინო დაწესებულებებში სამუშაო პროცესი ჯანდაცვის სამინისტროს რეკომენდაციების გათვალისწინებით მიმდინარეობს. მათივე ინფორმაციით, ქალაქ მცხეთაში, რამდენიმე კვირის წინ, შესაბამისი აპარატურითა და ინვენტარით აღჭურვილი ცხელების კლინიკაც გაიხსნა.