მარტვილის მუნიციპალიტეტში, კორონავირუსის გავრცელების პრევენციული ღონისძიებების ფარგლებში, თერმოსკრინინგი დაიწყო. როგორც „ინტერპრესნიუსს“ სამეგრელო-ზემო სვანეთის სახელმწიფო რწმუნებულის აპარატიდან აცნობეს, ადგილობრივ მოსახლეობას საზოგადოებრივი ჯანდაცვის წარმომადგენლები და ამბულატორიის ექიმები სახლში აკითხავენ და ტემპერატურას უზომავენ.
მათივე ინფორმაციით, თერმოსკრინინგის პროცესს მარტვილის მუნიციპალიტეტის მერი ალექსანდრე გრიგალავა და მერის მოადგილე აკაკი ხუნწელია გაეცნენ.
„თერმოსკრინინგი დღეს დაიწყო და მუნიციპალიტეტის მასშტაბით ყველა ადმინისტრაციულ ერთეულში განხორციელდება. პროცესში აქტიურად არიან ჩართულები მერიის წარმომადგენლები“, - ნათქვამია ინფორმაციაში.