გარემოს დაცვისა და ბუნებრივი რესურსების კომიტეტი გარემოზე ზემოქმედების შეფასების პროცედურაზე აღსრულების კონტროლს აგრძელებს - ამის შესახებ კომიტეტის თავმჯდომარემ, ნინო წილოსანმა განაცხადა.

მისი თქმით, აღსრულების კონტროლზე ონლაინ რეჟიმში წაიმართა შეხვედრა და აღნიშნულ საკითხთან დაკავშირებით, 30 აპრილსა და 1 მაისს დაკავშირებული ორგანიზაციების და უწყებების ზეპირი მოსმენა გაიმართა.

„მიმდინარე კვირის მანძილზე გარემოს დაცვის და ბუნებრივი რესურსების კომიტეტი ჩვეულ რეჟიმში დაგეგმილი აქტივობებით განაგრძობს მუშაობას. საზედამხედველო ფუნქციის ერთ-ერთი უმნიშვნელოვანესი ინსტრუმენტი - თემატური მოკვლევები, რომელიც დაწყებული გვაქვს, გრძელდება. ამ კვირის მანძილზე, გარემოზე ზემოქმედების შეფასების აღსრულებაზე კონტროლის ორი ონლაინ შეხვედრა გავმართეთ ამ სფეროს წარმომადგენლებთან და დაკავშირებულ ორგანიზაციებთან. შეხვედრებმა საინტერესოდ ჩაიარა, უამრავი ინფორმაცია მივიღეთ თემის შესახებ. ორივე შეხვედრა ექსპერტის და კომიტეტის სხვა წევრების მონაწილეობით განხორციელდა“,- განაცხადა ნინო წილოსანმა.

მან კიდევ ერთხელ აღნიშნა, რომ კომიტეტი არ წყვეტს მუშაობას და მნიშვნელოვან და აუცილებელ საკითხებს კორონავირუსის პრევენციის მიზნით, ონლაინ რეჟიმში განიხილავს.

„პარალელურ რეჟიმში, იმავე სამუშაო ფორმატით განაგრძობს მუშაობას კომიტეტის აპარატი. ორი დღის მანძილზე, კვირის განმავლობაში, NDI-ის ორგანიზებით, იმართება აპარატის თანამშრომლების ტრენინგი წყლის რესურსების კანონპროექტთან დაკავშირებით გენდერული ზეგავლენის ანალიზის მოსამზადებლად. ორივე პროცესი მნიშვნელოვანი და საინტერესოა. ვგეგმავთ ამ საკითხების, მაქსიმუმ, მაისის ბოლოს-ივნისის შუა რიცხვებში დასრულებას და კომიტეტს საინტერესო დასკვნები, რეკომენდაციები და პოზიცია ექნება“,- განაცხადა წილოსანმა.

აღნიშნულ კომენტარს საქართველოს პალამენტის პრესსამსახური ავრცელებს.