რუსთავში COVID 19-ით დაავადებული ახალგაზრდის ინფიცირების წყარო ამ ეტაპზე უცნობია, ახლო კონტაქტი კი სულ ექვსია, - ამის შესახებ რუსთავის მერმა ირაკლი ტაბაღუამ ჟურნალისტებთან საუბარში განაცხადა.

„9:00 საათისთვის ყველა ახლო კონტაქტი დადგენილი იყო და 9:30-დან დავიწყეთ უკვე ის პროცედურები, რომელიც გაწერილია და რომლის ჩატარებაც სავალდებულოა. სხვა კონტაქტების დადგენა მიმდინარეობს და ველოდებით ახალ ინფორმაციას. რა პროფესიაც ამ ადამიანმა აირჩია, აქედან გამომდინარე ჰქონდა ინფორმაცია ამ ვირუსზე და რჩებოდა იზოლაციაში. ინფიცირების წყარო ჯერ არ არის ცნობილი. ახლო კონტაქტები ძირითადად ოჯახის წევრები არიან, ისინი გადაყვანილი არიან და 6 საკვლევი მასალაა აღებული", - განაცხადა რუსთავის მერმა.

რუსთავში კოვიდ ინფიცირების მეცხრე შემთხვევა გამოვლინდა, დაავადებული ახალგაზრდა სამედიცინო ინსტიტუტის პირველკურსელია. სახლში, სადაც ის ცხოვრობდა, დეზინფექცია დილით ჩატარდა.