ბოლნისის მუნიციპალიტეტიდან, სადაც გუშინ ინციდენტი მოხდა, კორონავირუსით დაინფიცირებული პირები კლინიკაში გადაჰყავთ

ბოლნისის მუნიციპალიტეტის სოფელ მუშევანიდან კორონავირუსით დაინფიცირებული პირები კლინიკაში გადაჰყავთ, - აღნიშნულის შესახებ „ინტერპრესნიუსს“ ბოლნისის საკრებულოს თავმჯდომარემ თამაზ ჟორჟოლიანმა განუცხადა.

როგორც ის განმარტავს, მას შემდეგ რაც ადგილობრივები სიტუაციაში გაარკვიეს და ყველაფერი აუხსნეს, მდგომარეობა დასტაბილურდა.

„გაუგებრობას ჰქონდა ადგილი, ამ ადამიანებმა რაღაცები არასწორად გაიგეს, ავუხსენით ყველაფერი და ეს ადამიანები უკვე სასწრაფოს მანქანებში იმყოფებიან და კლინიკაში გადაჰყავთ. როგორც მე ვიცი, 9 თუ 10 დაინფიცირებული პირია, ერთი ოჯახის წევრი 4 პირია, დანარჩენი მეზობლები არიან. გამოკვეთილად ერთი ოჯახი იყო გადაყვანის წინააღმდეგი და სიტუაცია უკვე დალაგდა, ყველაფერი ავუხსენით, ვუთხარით, რომ კარგი საავადმყოფო, კარგი ექიმები არიან, კარგი კვებაა და დამშვიდნენ“, - განაცხადა ჟორჟოლიანმა.

შეგახსენებთ, რომ შინაგან საქმეთა სამინისტრომ ბოლნისის სოფელ მუშევანში მომხდარ ინციდენტთან დაკავშირებით გამოძიება დაიწყო. როგორც “ინტერპრესნიუსს” უწყებაში განუცხადეს, გამოძიება სსკ-ს 187-ე მუხლით დაიწყო, რაც სხვისი ნივთის დაზიანებას ან განადგურებას გულისხმობს.

ცნობისთვის, გუშინ, სოფელ მუშევანში დაპირისპირება მაშინ მოხდა, როდესაც ადგილზე კორონავირუსით ინფიცირებული პაციენტების კლინიკაში გადასაყვანად ჯგუფი მივიდა.

ზაზა ფირალიშვილი - სამწუხაროდ, ჩვენი პოლიტიკური სპექტრი და უბრალო ადამიანები განსხვავებულ სამყაროებში ცხოვრობენ, ვფიქრობ, ეს არის სერიოზული პოლიტიკური, უფრო მეტიც, საზოგადოებრივი კრიზისის ნიშანი
ქართული პრესის მიმოხილვა 14.06.2021
კარლ ჰარცელი - მჯერა, რომ 19 აპრილის შეთანხმებით, სულ მცირე, კრიზისის ეს თავი დაიხურა - საბოლოო ჯამში, ეს ახალი ეპოქის დასაწყისია