ირაკლი ჩიქოვანი L'Opinion-ის სტატიაზე - ივანიშვილის მონაწილეობა Covid-19-თან ბრძოლაში და მმართველი გუნდის გადაწყვეტილებები ერთ-ერთი სამაგალითოა როგორც ევროპაში, ისე მსოფლიოში

მიუხედავად პოლიტიკურად მოტივირებული სპეკულაციებისა და პოლიტიკური ძალების მცდელობისა, დააკნინონ ის შედეგები, რაც ქვეყანას აქვს, ფაქტია, რომ ბიძინა ივანიშვილის მონაწილეობა კოვიდ-19-თან ბრძოლაში და მთლიანად პოლიტიკური გუნდის მიერ მიღებული გადაწყვეტილებები ერთ-ერთი სამაგალითოა როგორც ევროპაში, ისე მსოფლიოში, რომ ერთად შესაძლებელია Covid-19-თან ეფექტიანი ბრძოლა, - ასე გამოეხმაურა საქართველოს პრემიერ-მინისტრის მრჩეველი საერთაშორისო ურთიერთობათა საკითხებში ირაკლი ჩიქოვანი ფრანგულ გამოცემა L'Opinion-ში გამოქვეყნებულ სტატიას, რომელშიც საუბარია Covid 19-თან ბრძოლის პროცესში, „ქართული ოცნების“ სახელისუფლებო გუნდის მიერ მიღწეულ წარმატებებზე.

პრემიერის პრესსპიკერმა აღნიშნა, რომ საქართველო კიდევ ერთხელ მოხვდა საერთაშორისო მედიის ყურადღების ქვეშ იმ თანმიმდევრული, სისტემური მიდგომის მეშვეობით, რომელმაც ქვეყანას Covid-19-თან ბრძოლაში პოზიტიური შედეგები მოუტანა.

„ხაზი მინდა გავუსვა იმ გარემოებასაც, რომ გამოცემაში საუბარია იმაზე, რომ არა მხოლოდ ამ კონკრეტულ შემთხვევაში მიიღო საქართველომ თანმიმდევრული გადაწყვეტილებები, არამედ უკვე წლებია, განაგრძობს სტაბილური სახელმწიფოს მშენებლობას, რომელიც რეალურად შეიცვალა და კიდევ უფრო ახლოს არის ევროკავშირთან. მისი მისწრაფებები არის ძალიან სწორი, ადეკვატური და ევროპამაც შესაბამისად უნდა დაინახოს. ძალიან დადებითია ის გარემოება, რომ ჩვენ განვიხილებით ერთ-ერთ საუკეთესო მაგალითად და ეს არ არის მხოლოდ ერთი ავტორის აზრი, არამედ იგი ეყრდნობა სხვა მნიშვნელოვან საერთაშორისო კვლევით ინსტიტუტებსაც, სადაც საქართველო განხილულია ერთმნიშვნელოვნად პოზიტიურად“, - აღნიშნა ირაკლი ჩიქოვანმა.

ფრანგული გამოცემა L'Opinion-მა გამოაქვეყნა სტატია, რომელშიც აღნიშნულია, რომ მაშინ, როდესაც ევროკავშირი ჯანდაცვისა და ეკონომიკის სფეროებში უპრეცედენტო კრიზისის წინაშე აღმოჩნდა, სამი მცირე ზომის ქვეყანა - სინგაპური, შვეიცარია და საქართველო პანდემიის პირობებში ბევრად უკეთ მუშაობენ და არსებულ გამოწვევებს კარგად ართმევენ თავს. სტატიაში დაფიქსირებულია, რომ საქართველო ზედმიწევნით კარგად ართმევს თავს ახალი კორონავირუსის ეპიდაფეთქებას, რაც კრიზისის მართვის გადამწყვეტი ზომების მიღების წყალობით მოხდა.

აღნიშნულ ინფორმაციას პრემიერ-მინისტრის პრესსამსახური ავრცელებს.

ლევან ლორთქიფანიძე - მეგობრების გადამტერებით ქვეყნის უსაფრთხოების უზრუნველყოფა შეუძლებელია
ქართული პრესის მიმოხილვა 06.05.2024
პატრიარქის სააღდგომო ეპისტოლე
IPS-ის ორგანიზებით თბილისში ევროპული ბრენდის - URSA-ს ხმის და თბოიზოლაციის მასალების პრეზენტაცია გაიმართება
ვრცელდება თუ არა თქვენს ავტომობილზე Toyota 10/Lexus 10-ის გარანტია?
ADB-მ და Mastercard-მა ფინანსური ინკლუზიისა და ციფრული ინოვაციების გასაუმჯობესებლად ურთიერთგაგების მემორანდუმს მოაწერეს ხელი