რუსთავში, კორონავირუსით ინფიცირებული ახალი პაციენტის ახლო კონტაქტების ტესტის პასუხი უარყოფითია
რუსთავში კორონავირუსით დაინფიცირებული ახალგაზრდის 7 ახლო კონტაქტიდან, ლაბორატორიული კვლევის შედეგად, ვირუსი არცერთს არ დაუდასტურდა, თუმცა ეს არ გვაძლევს დამშვიდების უფლებას, - ამის რუსთავის მერმა ირაკლი ტაბაღუამ ჟურნალისტებთან საუბარში განაცხადა.
"7 ახლო კონტაქტიდან კორონავირუსი არცერთს არ აღმოაჩნდა, თუმცა მათზე დაკვირვება გაგრძელდება, ვინაიდან ორკვირიანი საინკუბაციო პერიოდი ჯერ გასული არ არის. ასევე დადგენილია გარე კონტაქტები, ასეთი სულ 35-მდეა და მათთან ეპიდემიოლოგები მუშაობენ. დაკვირვების პროცესი როგორც შიდა, ასევე გარე კონტაქტებზე აქტიურად გაგრძელდება. სამწუხაროდ, დაინფიცირების წყარო კვლავ უცნობია", - განაცხადა რუსთავის მერმა ირაკლი ტაბაღუამ.
რუსთავში, სამედიცინო უნივერსიტეტის პირველი კურსის სტუდენტს კორონავირუსი ლაბორატორიულად გუშინ დაუდასტურდა, მანამდე ის სახლში, იზოლაციაში იმყოფებოდა. რუსთავის ცხელების ცენტრში არიან მოთავსებული მისი ოჯახის წევრები, რომელთაც საკარანტინო სივრცეში გადაიყვანენ.
v-if="article.gallery" v-html="article.gallery"
