ბათუმის საკრებულოს შენობასთან "ერთიანი ნაციონალური მოძრაობის" წევრმა მირდატ ქამადაძემ აქცია - პერფორმანსი გამართა. იგი ბათუმის საკრებულოს რიგგარეშე სხდომის ჩატარებას და ანტიკრიზისული გეგმის განხილვას სთხოვს. მირდატ ქამადაძემ საკრებულოს შენობასთან სამშენებლო ხელსაწყოები, ტაქსის ემბლემა და სხვადასხვა ნივთები მიიტანა. მისი თქმით, აქცია პერფორმანსი გამოხატავს იმას, რომ ათასობით ბათუმელს კორონავირუსის გამო ფინანსური პრობლემა შეექმნა და კრიზისიდან გამოსასვლელ გეგმაზე მთავრობამ უნდა იმსჯელოს.

“მე ამ პროფესიის ადამიანებთან ერთად, ველოდები როდის დანიშნავს ბათუმის საკრებულოს თავმჯდომარე რიგგარეშე სხდომას. მაინტერესებს ეყოფა თუ არა "ქართული ოცნების" დეპუტატებს გამბედაობა მოვიდნენ სხდომაზე. ვიმსჯელებთ, მაგალითად, ბათუმობისთვის გამოყოფილ ნახევარ მილიონ ლარზე, რომელიც ღონისძიების აღსანიშნავად ვეღარ დაიხარჯება. სად უნდა წავიდეს ეს თანხა?” - აცხადებს მირდატ ქამადაძე.