ბოლნისის მერის, დავით შერაზადიშვილის განცხადებით, მათ მხარეში, კერძოდ კი, სოფელ მუშევანში კორონავირუსის ორი ახალი შემთხვევა გამოვლინდა.

როგორც შერაზადიშვილი „ინტერპრესნიუსთან“ საუბარში განმარტავს, ახალი შემთხვევები მუშევანში დაინფიცირებული პირების ახლო კონტაქტები არიან.

„დღეს ორი დაინფიცირებული დაგვემატა, ორივე სოფელ მუშევანის კლასტერია. საერთო ჯამში, ამ 45-ე დღეს ბოლნისის მუნიციპალიტეტში 120 შემთხვევაა, მათგან 3 გარდაცვლილი და 15 გამოჯანმრთელებულია. საინფორმაციო კამპანია ყველა სოფელში გრძელდება, აღნიშნულში მაჟორიტარი დეპუტატი, მუნიციპალიტეტის მერი და ყველა პასუხისმგებელი პირია ჩართული. სურსათით და მედიკამენტით უზურნვეყოფილია ყველა დასახლებული პუნქტი, სასოფლო-სამეურნეო სამუშაოები ამინდიდან გამომდინარე მიმდინარეობს, შეუფერხებლად გადაადგილდებიან ფერმერები და ყველა პირი, ვინც სოფლის მეურნეობასთანაა დაკავშირებული. მოწყვლადი ჯგუფებისთვის სასურსათო პაკეტები რიგდება, დღევანდელი დღისთვის 13 000 სასურსათო პაკეტი გვაქვს დარიგებული“, - განაცხადა შერაზადიშვილმა.