რუხის საავადმყოფოში აცხადებენ, რომ კლინიკაში კიდევ ერთი პაციენტი მოათავსეს, რომელსაც კორონავირუსზე PCR ტესტირების შედეგად, სუსტად დადებითი პასუხი გამოუვლინდა
რუხის საავადმყოფოში მოთავსებულ კიდევ ერთ პაციენტს PCR ტესტირების შედეგად, კორონავირუსზე სუსტად დადებითი პასუხი აჩვენა.
ამის შესახებ „ინტერპრესნიუსს“ რუხის საავადმყოფოს კლინიკური დირექტორის მოვალეობის შემსრულებელმა ნიკოლოზ ქარცივაძემ განუცხადა.
მისივე თქმით, აღნიშნული პაციენტი კლინიკაში საკარანტინე ზონიდან გადაიყვანეს და მასთან განმეორებითი ტესტირება იგეგმება.
„ქალბატონი მოიყვანეს, სუსტად დადებითი აჩვენა PCR ტესტირებამ და იგეგმება ამ ტესტის განმეორება. პასუხები გვეცოდინება ხვალ. ასევე, კიდევ გარკვეული სხვა კვლევები უტარდება პაციენტს და იმ კვლევების შემდეგ, გადაწყდება ტაქტიკა, როგორ მოვიქცეთ შემდეგ. ეს პაციენტიც საკარანტინე ზონიდანაა“, - განაცხადა ნიკოლოზ ქარცივაძემ.
