სამეგრელო-ზემო სვანეთის სახელმწიფო რწმუნებულმა, ალექსანდრე მოწერელიამ პარლამენტის წევრებთან მერაბ ქვარაიასთან და ჯუმბერ იზორიასთან ერთად ზუგდიდის ინფექციური საავადმყოფოს მედპერსონალს გიორგობის დღესასწაული მიულოცა და გაწეული საქმიანობისთვის მადლობა გადაუხადა, - ამის შესახებ „ინტერპრესნიუსს“ სამეგრელო-ზემო სვანეთის სახელმწიფო რწმუნებულის პრესსამსახურიდან აცნობეს.
,,თქვენი წვლილი მსოფლიო პანდემიასთან ბრძოლის საკითხში უმნიშვნელოვანესია, ზუგდიდის ინფექციურმა საავადმყოფომ მოახერხა ის, რომ თქვენთან შემოსული ორივე ინფიცირებული პაციენტი უკვე გამოჯანმრთელებულია და სტაციონარიდან გაწერილები არიან - მადლობა ამისთვის. არის შემთხვევები, როდესაც ხდება მედპერსონალის ინფიცირება, თქვენს შემთხვევაში მსგავის რამ არ დაფიქსირებულა, რაც კიდევ ერთხელ მიუთითებს თქვენს მაღალ პროფესიონალიზმზე, კიდევ ერთხელ გიხდით მადლობას“, - განაცხადა სახელმწიფო რწმუნებულმა.
უწყების ცნობით, ზუგდიდის ინფექციური საავადმყოფო 6 თანამედროვე ტექნოლოგიებით აღჭურვილ ბოქსირებულ პალატას ფლობს, საავადმყოფოს ლაბორატორიამ ბოლო ერთი კვირაა, რაც კოვიდ19-ის გამოკვლევა „პისიარ“ ტექნოლოგიით დაიწყო. ამ ეტაპისთვის 500-მდე ბიოლოგიური ნიმუშია გამოკვლეული.