ქობულეთის მუნიციპალიტეტის 4 ადმინისტრაციულ ერთეულში ამ წუთებში ბლოკ-პოსტების სადემონტაჟო სამუშაოები მიმდინარეობს, - აღნიშნულის შესახებ „ინტერპრესნიუსს“ ქობულეთის მერმა მირიან ქათამაძემ განუცხადა.
როგორც ის განმარტავს, ქობულეთში მოძრაობა უკვე აღდგენილია.
„ახლა შინაგან საქმეთა სამინისტროს წარმომადგენლებთან ერთად გვარას ბლოკ-პოსტზე ვიმყოფები, უკვე სადემონტაჟო სამუშაოები მიმდინარეობს. როგორც იცით, საკოორდინაციო საბჭოს მიერ დღეიდან შეზღუდვების მოხსნაზე გადაწყვეტილება იქნა მიღებული, რომელიც ქობულეთის მუნიციპალიტეტის 4 ადმინისტრაციულ ერთეულს ეხება. ეს გადაწყვეტილება იმ დინამიკის ანალიზსა და დასკვნას ემყარება, რომელიც მომზადდა.
ძალიან დიდი სამუშაო ჩატარდა აქ, გამოვლინდა 570-ზე მეტი კონტაქტი, 33 788 ადამიანს ჩაუტარდა თერმოსკრინინგი, აქედან 32 საყურადღებო შემთხვევა იყო, რომელთაგან ყველა უარყოფითი აღმოჩნდა. 10-ზე მეტი გამოჯანმრთელებული გვყავს, ახალი შემთხვევები კვირაზე მეტია არ დაფიქსირებულა და პირველი შემთხვევის აღმოჩენის დღიდან, მეორე საინკუპაციო პერიოდი მთავრდება.
აქ ახლა ასეთი ვითარებაა: მოძრაობა აღდგა და როგორც გითხარით, საგუშაგოების დემონტაჟი მიმდინარეობს, ამას თავდაცვის ძალები ახორციელებენ, შინაგან საქმეთა სამინისტროს წარმომადგენლებიც აქ არიან“, - განაცხადა ქათამაძემ.
