ფოთის ,,ცხელების კლინიკაში“ 4 პირის ლაბორატორიული კვლევის შედეგს ელოდებიან, მათ შორის ერთი 8 თვის ბავშვია. ექიმების თქმით, ბიოლოგიური მასალა ლუგარის ლაბორატორიაში უკვე გაიგზავნა.
,,გვყავს ოთხი ახალი პაციენტი: 8 თვის გოგონა, 71 წლის მამაკაცი და 32 წლის ქალი ფოთიდან და 66 წლის მამაკაცი ოზურგეთიდან. ისინი მოთავსებული არიან ბოქსირებულ პალატებში. ყველა მათგანს აღენიშნება ცხელება, ყელის ტკივილი, ხველა. პაციენტების ბიოლოგიური მასალა გაიგზავნა ლუგარის ლაბორატორიაში და პასუხები სავარაუდოდ, დღის ბოლოს, ან ხვალ გახდება ცნობილი. მათი ჯანმრთელობის მდგომარეობა დამაკმაყოფილებელია,“- განაცხადა ფოთის ჰოსპიტალის დირექტორმა თეა მიგინეიშვილმა.