საქმე გვაქვს პოლიტიკურ თვალთმაქცობასთან - ასე აფასებს პოლიტიკური გაერთიანება “ლელო საქართველოსთვის" ერთ-ერთი ლიდერი დავით უსუფაშვილი მთავრობის პოზიციას მიხეილ სააკაშვილის უკრაინის რეფორმების საბჭოს აღმასრულებელი კომიტეტის თავმჯდომარედ დანიშვნასთან დაკავშირებით.
როგორც „ინტერპრესნიუსს“ პოლიტიკური გაერთიანებიდან „ლელო საქართველოსთვის“ აცნობეს, უსუფაშვილის შეფასებით, საგარეო საქმეთა სამინისტროს განცხადება არის ჩვენი ეროვნული ღირსების შეურაცხმყოფელი.
„როდესაც უკრაინა თავის მოქალაქეს სადმე დანიშნავს, ამაზე საქართველო აღშფოთდება, ხოლო როცა იგივე უკრაინა საქართველოს მიერ ძებნილ მსჯავრდებულ ადამიანს საქართველოს არ აძლევს, მაშინ საქართველო კმაყოფილია. ანუ, რაშია საქმე? საქმე გვაქვს პოლიტიკურ თვალთმაქცობასთან. სააკაშვილი ამ ხელისუფლებას სჭირდება ხოლმე საფრთხობელად, ოპოზიციური სპექტრის, ასე ვთქვათ, თავში წამოსასმელად და ამასობაში ვერ გათავისუფლდა რაღაც ბოღმებისგან. საგარეო საქმეთა სამინისტროს განცხადება არის ჩვენი ეროვნული ღირსების შეურაცხმყოფელი, როდესაც ოფიციალური სტრუქტურა იმას წერს, რაც იქ ჩაწერეს, რომ აი, უკრაინის პოლიტიკური სპექტრი მიხვდა, თუ რა პრობლემები აქვს ამ პერსონას და ჩვენი აზრიც, როგორც ჩანს, გაითვალისწინა და ასე შემდეგ. ეს არის სირცხვილი", - განაცხადა დავით უსუფაშვილმა.