სოფელ მუშევანში რისკჯგუფებში მყოფი მოსახლეობის ბიოლოგიური ნიმუშების აღება აქტიურად მიმდინარეობს. ამის შესახებ „ინტერპრესნიუსს“ ბოლნისის მუნიციპალიტეტის მერიიდან აცნობეს.

მათი ინფორმაციით, მოქალაქეებს PSR ტესტირებას ბოლნისის საზოგადოებრივი ჯანდაცვის ცენტრის თანამშრომლებთან ერთად დაავადებათა კონტროლისა და საზოგადოებრივი ჯანმრთელობის ეროვნული ცენტრის სპეციალისტები უტარებენ.

მუნიციპალიტეტის ცნობით, PSR ტესტის მეშვეობით, მოსახლეობის მასობრივი შემოწმების პროცესს დღეს ბოლნისის მუნიციპალიტეტის მერი დავით შერაზადიშვილი, მაჟორიტარ დეპუტატ გოგი მეშველიანთან და საკრებულოს თავმჯდომარე თამაზ ჟორჟოლიანთან ერთად დაესწრო.

„სოფელში შემდგომი კვლევების აუცილებლობა სწორედ PSR ტესტების მეშვეობით აღებული ბიოლოგიური ნიმუშების პასუხების შედეგად გადაწყდება. აღსანიშანავია, რომ ამ დროისთვის მუშევანში კორონავირუსის 28 შემთხვევაა დაფიქსირებული.

ბოლნისის მუნიციპალიტეტში კორონავირუსი 122 მოქალაქეს დაუდასტურდა. 46 პირი გამოჯანმრთელდა, 3 კი გარდაიცვალა. ამ დროისთვის თვითიზოლაციაში 73, კარანტინში კი 69 მოქალაქე იმყოფება“,- ნათქვამია მუნიციპალიტეტის მერიის მიერ გავრცელებულ ინფორმაციაში.