ლევან დავითაშვილი - მწარმოებლის გაფართოებული ვალდებულება ისტორიული რეფორმაა და საკანონმდებლო პაკეტს უახლოეს მთავრობის სხდომაზე გავიტანთ

მწარმოებლის გაფართოებული ვალდებულება ძალიან მნიშვნელოვანი რეფორმაა გარემოს დაცვისა და ნარჩენების მართვის თვალსაზრისით , - ამის შესახებ გარემოს დაცვისა და სოფლის მეურნეობის მინისტრმა ლევან დავითაშვილმა განაცხადა.

როგორც მან აღნიშნა, საკანონმდებლო პაკეტს უახლოეს მთავრობის სხდომაზე წარადგენენ.

მისივე თქმით, რეფორმას ასევე არანაკლები მნიშვნელობა აქვს ბიზნესის განვითარებისა და ეკონომიკის თვალსაზრისითაც.

„როცა ვსაუბრობთ მწვანე და მდგრად ეკონომიკურ განვითარებაზე, ის თავის თავში მოიცავს ცირკულარული ეკონომიკის ელემენტებს და მისი სტიმულირების ყველაზე მსხვილი პაკეტია წარმოების გაფართოებული ვალდებულების შემოღება, ანუ, ის პოლიტიკა, რომელიც ქვეყანამ აირჩია, საკანონმდებლო დონეზე მიიღო გადაწყვეტილებები და ახლა კანონქვემდებარე აქტებზე მიდგა ჯერი. შეთანხმების პროცესი, ფაქტობრივად, დასრულებულია. საკანონმდებლო ინიციატივებს წინ უსწრებდა ინტენსიური მოლაპარაკებები ბიზნესთან. გათვალისწინებულია ბიზნესის წარმომადგენლების მოსაზრებები. ეს რთული და მე ვიტყოდი, ისტორიული რეფორმა, ძალიან ახლოს არის განხორციელებასთან. იცით, რომ მთავრობა უკვე დაუბრუნდა ჩვეულ სამუშაო რეჟიმს და პაკეტს მთავრობის უახლოეს სხდომაზე გამოვიტანთ. ის უკვე შეთანხმებულია სამინისტროებთან. ძირითადი მიმართულებები უკავშირდება 4 პროდუქტს. ჩვენ უახლეს მომავალში გვექნება მიღებული მთავრობის დადგენილება.

რაც შეეხება მასალებს, რომლებიც ყველაზე უფრო სპეციფიკური და რთული საკითხია, ამაზე დასრულდება კონსულტაცია, მათ შორის, მუნიციპალიტეტებთან, რადგან მათი როლის დაბალანსება არის გასათვალისწინებელი. იცით, რომ ძალიან მნიშვნელოვანი რეფორმა უკავშირდება ე.წ. სადეპოზიტო სისტემას; თანამედროვე სისტემას, რომელიც ყველაზე წარმატებულია ევროპის ქვეყნებში და მთელ მსოფლიოში და გულისხმობს კონკრეტულად მწარმოებლების მხრიდან ამა თუ იმ პლასტიკის შესაფუთი მასალის ჩაბარების ვალდებულებას. ეს ბოთლებს ეხება, მაგრამ ზოგადად, შესაფუთი მასალები ძალიან დიდ ნარჩენებს წარმოქმნის და დიდ სანედლეულო წყაროს წარმოადგენს ზოგადად ბიზნესისთვის და გადამუშავებისთვის. ჩვენ ვხედავთ, რომ ბიზნესის წარმომადგენლების მხრიდან არის დიდი ინტერესი. პანდემიის გამო გეგმებმა ცოტა გადაიწია, თუმცა დღის წესრიგში რჩება“, - განაცხადა ლევან დავითაშვილმა.

ზვიად კირტავა - მთავარი მიზანი მაინც არის ინფიცირების ჯაჭვის გაწყვეტა და შემთხვევების შემცირება, ამის მიღწევის გარეშე საწოლების და პერსონალის კიდევ გაზრდაც ვერ აგვაცილებს ჯანდაცვის სისტემის გადატვირთვას
ქართული პრესის მიმოხილვა 04.12.2020
ვანო მაჭავარიანი - თუ ხელისუფლება და ოპოზიცია კოალიციური მმართველობის რაღაც ფორმაზე არ შეთანხმდნენ, ეს საქართველოსთვის უკეთესი პერსპექტივის ხელიდან გაშვებული შესაძლებლობა იქნება
საახალწლო შეთავაზება მრავალფუნქციური კომპლექსისგან "მოედანი"
ზოომარტი ექსკლუზიურად Wolt-ზე
თანამედროვე, მარტივი და უსაფრთხო ახალი ინტერნეტბანკინგი "პროკრედიტ ბანკის" მომხმარებლებისთვის