კახეთის რეგიონში ინფრასტრუქტურული პროექტების განხორციელება განახლდა და სამუშაოები აქტიურ რეჟიმში მიმდინარეობს. როგორც „ინტერპრესნიუსს“ კახეთის სამხარეო ადმინისტრაციის პრესსამსახურიდან აცნობეს, კახეთის მხარეში სახელმწიფო რწმუნებული, ირაკლი ქადაგიშვილი და გურჯაანის მუნიციპალიტეტის მაჟორიტარი დეპუტატი, დავით სონღულაშვილი ქალაქ გურჯაანში ინოვაციების რეგიონული ცენტრის მშენებლობის პროცესს ადგილზე გაეცნენ.

„ჩვენი ქვეყნისთვის განათლება და ახალგაზრდობა ერთ-ერთი მნიშვნელოვანი პრიორიტეტია. კახეთის რეგიონში ორი ტექნოპარკი ახმეტასა და თელავში უკვე გაიხსნა. რეგიონული ინოვაციების ცენტრი, რომელიც გურჯაანში შენდება, რეგიონისთვის მესამე იქნება, რაც ახალგაზრდებისთვის, მათი ინტერესების შესაბამისად, ახალი მიზიდულობის ცენტრი გახდება”,- აღნიშნა ირაკლი ქადაგიშვილმა.

გურჯაანის მაჟორიტარი დეპუტატის, დავით სონღულაშვილის განცხადებით, ინოვაციების რეგიონული ცენტრის მშენებლობის პროცესი ახალგაზრდებს შესაძლებლობას მისცემს, თავიანთი იდეებისა და ცოდნის რეალიზაცია განახორციელონ.

„ძალიან მნიშვნელოვანია გურჯაანისთვის ინოვაციების ცენტრის მშენებლობა. ახალგაზრდებს მიეცემათ შესაძლებლობა, ეზიარონ ყველა იმ თანამედროვე ტექნოლოგიას, რომელზე წვდომაც დღეს, სამწუხაროდ შეზღუდულია. ეს იქნება შესაძლებლობა, მოახდინონ თავიანთი იდეებისა და ცოდნის რეალიზაცია“,- აღნიშნა დავით სონღულაშვილმა.

რეგიონული ინოვაციების ცენტრის მშენებლობას მუნიციპალური განვითარების ფონდი აფინანსებს და პროექტის ჯამური ღირებულება 2 მლნ. 400 ათას ლარს შეადგენს.