ზუგდიდში ინფიცირებული ტრაილერის მძღოლის დედას და შვილებს კორონავირუსი დაუდგინდათ. ქალი და ორი არასრულწლოვანი ამჟამად რუხის კლინიკაში მკურნალობს.
როგორც რუხის კლინიკის კლინიკური დირექტორის მოვალეობის შემსრულებელმა ნიკოლოზ ქარცივაძემ „ინტერპრესნიუსს“ განუცხადა, მათი ჯანმრთელობის მდგომარეობა სტაბილურია.
„ორი მოზარდია და ერთი ასაკოვანი ქალბატონი. მიმდინარეობს კვლევები. მოზარდებს მკურნალობა არ სჭირდებათ. გარკვეული მკურნალობა აქვს დანიშნული ასაკოვან ქალბატონს. ამჟამად სტაბილურია, რაიმე პრობლემური არაფერი. აქვს გარკვეული ცვლილებები, ცოტა სიცხე ფიგურიებდა, ლაბორატორიული მაჩვენებლები არის ნორმიდან გადახრილი, მაგრამ ჯერჯერობით კლინიკურად კომპენსირებულია და დანარჩენს გვიჩვენებს დრო“, - განაცხადა ნიკოლოზ ქარცივაძემ.