აგრესიული ლობისტური და საჯარო კამპანია, რომელსაც ფრონტერა მიმართავდა და ახლაც მიმართავს, ჩვენზე პოლიტიკური ზეწოლის განხორციელებასა და გარკვეულწილად, საარბიტრაჟო გადაწყვეტილების რევიზიას ისახავს მიზნად , - ამის შესახებ ნავთობისა და გაზის კორპორაციის მრჩეველი, ვაჟა ხიდაშელი აცხადებს.

როგორც "ინტერპრესნიუსს" საქართველოს ნავთობისა და გაზის კორპორაციიდან აცნობეს, ამერიკელი სენატორების წერილს საქართველოს ნავთობისა და გაზის კორპორაცია პასუხობს.

“ჩვენ "ფრონტერას" გადაწყვეტილების გასაჯაროებაზე თანხმობის მისაღებად მივმართეთ, რაზეც კომპანიამ უარი გვითხრა. აგრესიული ლობისტური და საჯარო კამპანია, რომელსაც ფრონტერა მიმართავდა და ახლაც მიმართავს იმ მიზნით, რომ ჩვენზე გარკვეული ზეწოლა განახორციელონ და საარბიტრაჟო განხილვის შედეგების რევიზია მოახდინონ, პირველი არ არის. ჯერ კიდევ 2017 წლის ბოლოს, 2018 წლის დასაწყისში, ფრონტერა, იგივე მეთოდების გამოყენებით ცდილობდა, რომ დავა საერთოდ არ დაწყებულიყო.

რა მიზანიც ჰქონდათ, ის მიზანი აქვთ ახლაც, რომ ქართულ მხარეზე პოლიტიკური ზეწოლის გამოყენებით ტერიტორიაზე დარჩნენ. 27 ივლისს შესაბამისი ვადა იწურება, კომპანია საკონტრაქტო ტერიტორიაზე ნავთობისა და გაზის ოპერაციების განხორციელების ნაწილში უფლებებს დაკარგავს და ამ შედეგების თავიდან არიდება უნდა," - აცხადებს კორპორაციის მრჩეველი ვაჟა ხიდაშელი, რომელსაც საქართველოს ნავთობისა და გაზის კორპორაცია ავრცელებს.