გიორგი რურუა უნდა გათავისუფლდეს, წერტილი, როგორც მათ უყვართ, - ამის შესახებ „ევროპული საქართველოს“ ერთ-ერთმა ლიდერმა გიგი უგულავამ ჟურნალისტებს თბილისის საქალაქო სასამართლოში, გიორგი რურუას სასამართლო პროცესის დაწყებამდე განუცხადა.
მისი თქმით, რურუას წინააღმდეგ საქმე არის შეთითხნლი.
„მნიშვნელობა არ აქვს, მოსწონს თუ არა გიორგი რურუა ვინმეს, მის მიმართ წარმოებული საქმე არის შეთითხნილი, პოლიტიკურად მოტივირებული და ის უნდა გათავისუფლდეს, წერტილი, როგორც მათ უყვართ და ამ შემთხვევაში წერტილი მართლაც დაესმება. საჭირო არ არის გაჯიქება და ბაქი-ბუქი. საკუთარ სიტყვებს უნდა სცენ პატივი, იმიტომ, რომ ისინი დღეს, ინსტიტუტებს წარმოადგენენ“, - განაცხადა უგულავამ.
ცნობისთვის, გიორგი რურუა სამართალდამცავებმა 18 ნოემბერს, სსკ-ის 236-ე მუხლის მე-3 და მე-4 ნაწილებით გათვალისწინებული დანაშაულისთვის დააკავეს, რაც ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს.