„ახალი საქართველოს“ ლიდერის გიორგი ვაშაძის განცხადებით, ოპოზიციის დღევანდელ შეხვედრაზე, ქვეყანაში არსებულ უმძიმეს პოლიტიკურ, ეკონომიკურ, სოციალურ თემებზე, 8 მარტის შეთანხმების შესრულებაზე და მაჟორიტარულ საკითზებზე იმსჯელებენ.
როგორც გიორგი ვაშაძემ ოპოზიციის შეხვედრის დაწყებამდე ჟურნალისტებთან საუბარში განმარტა, გავრცელებული ინფორმაცია, თითქოს დღეს საარჩევნო სიებზე იმსჯელებენ არასწორია და ამაზე საუბარი ჯერ ადრეა.
„დღეს ჩვენ გვექნება გაერთიანებული ოპოზიციის „ძალა ერთობაშიას“ ფარგლებში შეხვედრა. ვიმსჯელებთ ქვეყანაში არსებულ უმძიმეს პოლიტიკურ, ეკონომიკურ, სოციალურ თემებზე და იმ ინიციატივებზე, რომლებიც აუცილებლად უნდა გვქონდეს ჩვენ ამ კრიზისის დაძლევის კუთხით. ასევე ვიმსჯელებთ, პოლიტიკურ პროცესებზე, რომლებიც მიმდინარეობს 8 მარტის შეთანხმების შესრულებაზე, ვიმსჯელებს, რა თქმა უნდა, მაჟორიტარულ საკითხებთან დაკავშირებით, იმიტომ, რომ ეს თემა წამოიჭრა და დაახლოებით მე ვფიქრობ, რომ 2 კვირის ფარგლებში ყველა პოლიტიკური ძალა უნდა ჩამოყალიბდეს საკუთარ პოზიციებში, მაჟორიტარულ ოლქებში თანამშრომლობასთან დაკავშირებით“ , - განაცხადა ვაშაძემ.