გერმანიის საგარეო საქმეთა მინისტრი, ჰეიკო მაასი მწუხარებას გამოთქვამს აშშ-ის მიერ „ღია ცის ხელშეკრულებიდან“ გასვლის თაობაზე. ქვეყნის მთავარი დიპლომატის თქმით, რუსეთის მიერ პირობების დარღვევა ვაშინგტონის საქციელს არ ამართლებს.
„ჩვენ ვნახეთ, რომ რუსეთის მხრიდან ხელშეკრულების პირობების განხორციელებაზე პრობლემები იყო, მაგრამ ჩვენი მოსაზრებით, ეს არ ამართლებს ამერიკის გასვლას ხელშეკრულებიდან“, - აღნიშნა მაასმა.
მისი თქმით, ბერლინი ვაშინგტონს მოუწოდებს, გადაწყვეტილებას კიდევ ერთხელ გადახედოს.
შეგახსენებთ, გუშინ აშშ-ის სახელმწიფო მდივანმა მაიკ პომპეომ განაცხადა, რომ აშშ-მ „ღია ცის შეთანხმებიდან“ გასვლის გადაწყვეტილება მიიღო და ამის მიზეზად მან რუსეთის მიერ ხელშეკრულების გარკვეული პუნქტების პერმანენტული დარღვევა დაასახელა.