მოსახლეობა თუშეთთან დამაკავშირებელი გზის გაწმენდას ითხოვს. ახმეტის მუნიციპალიტეტის ზემო და ქვემო ალვანის მცხოვრებლებმა აქცია გამართეს და კონტრაქტორ კომპანიას გზის გაწმენდითი სამუშაოების გაგრძელება მოსთხოვეს. ადგილობრივების თქმით, მას შემდეგ რაც ზვავის ჩამოწოლის დროს ერთი ადამიანი დაიღუპა, სამუშაოები აღარ გაგრძელებულა, რის გამოც მთაში საქონლის გადაყვანას ვერ ახერხებენ.
ადგილობრივი მოსახლეობის მოთხოვნები ადგილზე მოისმინა კონტრაქტორი კომპანიის წარმომადგენელმა. გიორგი წიკლაურის განმარტებით, იმის მიუხედავად რომ ზვავის ჩამოწოლის შედეგად 4 ერთეული მძიმე ტექნიკა დაზიანდა, კომპანია მზად არის სამუშაოები გაგრძელოს, თუმცა ზვავსაშიშროების გამო საგზაო დეპარტამენტის ნებართვას ელოდებიან. მისივე თქმით, თუ ამინდები არ გაუარესდა, შესაძლოა, ორშაბათიდან გზის გაწმენდა განახლდეს.