აჭარის ტელევიზიის სარედაქციო პოლიტიკაში ჩარევა არის ტყუილი და ყველა რედაქცია დამოუკიდებელია, - ასე გამოეხმაურა არხის სამეურვეო საბჭოს წევრი სოსო სტურუა საზოგადოება „მე მიყვარს ბათუმის" აქციას.
როგორც სოსო სტურუამ განაცხადა, ტელევიზიიდან მხოლოდ ორი ჟურნალისტია გაშვებული.
„მხოლოდ ორი თანამშრომელია გაშვებული და ჟურნალისტებს როცა ამბობენ უნდათ, რომ ბევრი წარმოაჩინონ. სარედაქციო პოლიტიკაში ჩარევა არის ტყუილი და ყველა რედაქცია არის დამოუკიდებელი",- აღნიშნა სოსო სტურუამ.
ცნობისთვის, საზოგადოებრივი მოძრაობა „მე მიყვარს ბათუმის" წევრებმა აჭარის ტელევიზიის შენობასთან კარავი გაშალეს.
აქციის ორგანიზატორი ალექსანდრე მილორავა კი პროტესტის ნიშნად შიმშილობს.
როგორც ორგანიზაციაში განაცხადეს, არხის სამეურვეო საბჭომ დირექტორს გიორგი კოხრეიძეს უნდობლობა უნდა გამოუცხადოს და მისი იმპიჩმენტის საკითხი დააყენოს.
აქციის მონაწილეების თქმით, გიორგი კოხრეიძე თანამდებობიდან უნდა გადადგეს, რადგან „ტელევიზიაში ჟურნალისტების დევნა, გადაცემების შეჩერება და პროგრამული პრიორიტეტების შეუსრულებლობა ხდება”.