ბელგიის პრინცს, რომელიც ესპანეთში გამართულ ერთ-ერთ წვეულებას დაესწრო, კორონავირუსი დაუდასტურდა, - ამის შესახებ ინფორმაციას ბელგიის სამეფო სასახლე ავრცელებს.
მათივე ინფორმაციით, პრინცს ვირუსის მსუბუქი სიმპტომები აღენიშნება.
ბელგიის სამეფო სასახლის ცნობით, მეფე ფილიპეს ძმისშვილი, 28 წლის პრინცი ხოაკიმი, ბელგიიდან ესპანეთში 26 მაისს ჩავიდა, ორი დღის შემდეგ ქალაქ კორდობაში გამართულ წვეულებას დაესწრო, რის შემდეგაც მას „კოვიდ 19“ დაუდასტურდა.
ესპანეთის მედიის ცნობით, წვეულებას სულ 27 ადამიანი ესწრებოდა და ყველა მათგანი კარანტინშია გადაყვანილი.
ესპანელმა სამართალდამცავებმა საქმეზე გამოძიება დაიწყეს.
ცნობისთვის, კორონავირუსთან დაკავშირებით დაწესებული შეზღუდვების ფარგლებში ქალაქ კორდობაში 15 ადამიანზე მეტის შეკრება იკრძალება. იმ შემთხვევაში, თუ აღმოჩნდა, რომ პირებმა, რომლებიც წვეულებას დაესწრნენ, შეკრების წესი დაარღვიეს, მათ 10 000 ევრომდე ოდენობის თანხით დაჯარიმება ემუქრებათ.