საქართველოს პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარე რომან კაკულიამ საქართველოში ევროკავშირის ელჩთან, კარლ ჰარცელთან ვიდეოშეხვედრა გამართა. საქართველოს პარლამენტის ინფორმაციით, დღეს გამართულ ვიდეოშეხვედრაზე რომან კაკულიამ და კარლ ჰარცელმა პოსტკრიზისულ პერიოდში ევროკავშირთან ეკონომიკურ სფეროში თანამშრომლობის პერსპექტიული მიმართულებები განიხილეს.

მათივე ცნობით, შეხვედრაზე განსაკუთრებული აქცენტი გაკეთდა ევროკავშირის დახმარების იმ სეგმენტზე, რომელიც მაკროფინანსურ სტაბილურობას ემსახურება და ასევე, ინტეგრაციულ პროცესებზე ისეთ მნიშვნელოვან სექტორებში, როგორიცა ტრანსპორტი, ენერგეტიკა, სოფლის მეურნეობა და პროფესიული განათლება.

შეხვედრაზე აღინიშნა, რომ მიმდინარე გამომწვევების ფონზე, აუცილებელია ერთობლივი ძალისხმევა, რათა არ შენელდეს რეფორმები ეკონომიკის ისეთ მნიშვნელოვან სექტორებში, როგორიც ენერგეტიკა, კერძოდ, ენერგოეფექტურობასთან დაკავშირებული რეფორმები, სატრანსპორტო მიმართულები, საგზაო უსაფრთხოები, ასევე ნარჩენების მართვისა და მომხმარებელთა უფლებების დაცვის საკითხებია. შეხვედრაზე ასევე, ისაუბრეს შავ ზღვასთან დაკავშირებული გამოწვევების კონტექსტში ევროკავშირთან თანამშრომლობის საჭიროებასა და ევროკავშირთან ინტეგრაციის პროცესებში შავი ზღვის ფარგლებში სავაჭრო ურთიერთობების ხელშემწყობის მნიშვნელობაზე.

„ამ საკითხებზე აქცენტის გაკეთება განაპირობა იმ გარემოებამ, რომ არსებული ფინანსური გამოწვევების ფონზე, შესაძლოა გართულდეს აღნიშნული რეფორმების წარმატებით განხორციელებისათვის აუცილებელი ფინანსური და ადამიანური რესურსების მობილიზება. ამდენად, კიდევ ერთხელ გაესვა ხაზი, ტრანსფორმაციის პროცესებში ევროკავშირის მუდმივი მხარდაჭერის მნიშვნელობას“, - განაცხადა შეხვედრის შემდეგ რომან კაკულიამ.