საქართველოს საგარეო საქმეთა სამინისტროს ინფორმაციით, საქართველოსა და სომხეთის მთავრობებს შორის ინტენსიური კომუნიკაციაა. ამის შესახებ „ინტერპრესნიუსს“ საგარეო უწყებიდან აცნობეს.

როგორც საქართველოს საგარეო საქმეთა სამინისტროს პრეს-სპიკერი აცხადებს, საქართველო სომხეთის დახმარების მზაობას კიდევ ერთხელ გამოთქვამს.

„აღსანიშნავია, რომ კოვიდ პანდემიის პერიოდში საქართველოს ხელისუფლებას აქვს ინტენსიური კომუნიკაცია სომხურ მხარესთან. რამდენიმე დღის წინ შედგა პრემიერ-მინისტრების გიორგი გახარიასა და ნიკოლ ფაშინიანის სატელეფონო საუბარი. კომუნიკაცია ასევე ხორციელდება ცალკეული მინისტრების დონეზეც. დღეს, საქართველოსა და სომხეთის საგარეო საქმეთა მინისტრებმა ინფორმაცია გაცვალეს COVID-19-ის პანდემიის მხრივ ქვეყნებში არსებულ მდგომარეობაზე დავით ზალკალიანმა სომხეთში COVID-19-ის პანდემიის შედეგად შექმნილი ვითარების გამო სოლიდარობა გამოუცხადა სომხურ მხარეს და საქართველოს მთავრობის სახელით კიდევ ერთხელ გამოთქვა დახმარების აღმოჩენის მზაობა“, - აცხადებენ უწყებაში.