პოლონეთი რამდენიმე ქვანახშირის მაღაროს დროებით დახურავს, რომ მაღაროელებში კორონავირუსის გავრცელება შეაჩეროს.
ვიცე-პრემიერის იაცეკ სასინის განცხადებით, ჯამში 12 მაღარო 3 კვირით დაიხურება. ქვეყანაში კორონავირუსის შემთხვევების თითქმის 20% მაღაროელებზე მოდის. იაცეკ სასინის თქმით, ეს ქმედებები აუცილებელია, რომ საბოლოოდ შეჩერდეს ეპიდემიური აფეთქება. მისივე თქმით, მაღაროელები ამ სამ კვირაში სრულ ანაზღაურებას მიიღებენ და ქვანახშირის მიწოდებასაც საფრთხე არ შეექმნება.
მაღაროელებს კორონავირუსზე სრულ შემოწმებას ჩაუტარებენ.
შეგახსენებთ, რომ კორნავირუსის შემთხვევებმა პოლონეთში სწრაფად იმატა, შემთხვევების ორი მესამედი კი ზემო სილეზას რეგიონში მდებარე მაღაროს უკავშირდება. ბოლო მონაცემებით, პოლონეთში ეპიდემიის გავრცელების დღიდან კორონავირუსით 27 000-ზე მეტი ადამიანი დაინფიცირდა, აქედან 1 166 - გარდაიცვალა.