რუსთავის „ცხელების ცენტრში“ კორონავირუსი 22 წლის ახალგაზრდა ქალს დაუდასტურდა
რუსთავის ცხელების ცენტრში მოთავსებულ ერთ პირს კორონავირუსი დაუდასტურდა. როგორც „ინტერპრესნიუსთან“ საუბარში რუსთავის ცენტრალური საავადმყოფოს დირექტორმა პაპუნა ბახტაძემ განაცხადა, 22 წლის ახალგაზრდა ქალი „ცხელების ცენტრში“ საკარანტინო სივრციდან შეიყვანეს.
„ის ერევანში სწავლობდა და საქართველოში სომხეთიდან დაბრუნდა. ტემპერატურა დაუფიქსირდა საკარანტინო სივრცეში ყოფნისას და გადმოიყვანეს „ცხელების ცენტრში“. ლუგარის ლაბორატორაში ბიოლოგიური მასალა გადავაგზავნეთ და დღეს დილით მას ლაბორატორიული კვლევის შედეგად კორონავირუსი დაუდგინდა. პაციენტი უკვე გადაყვანილია თბილისში სპეციალიზირებულ კლინიკაში, მისი ჯანმრთელობის მდგომარეობა საშუალო სიმძიმის არის. დღეს დილით ლაბორატორიაში კიდევ ორი პაციენტის სინჯები გადავაგზავნეთ, ორივეს ტემპერატურა აქვს“, - განაცხადა პაპუნა ბახტაძემ.
