ირანის ხელისუფლება აცხადებს, რომ პირი, რომელმაც აშშ-სა და ისრაელს ყასემ სულეიმანის ადგილსამყოფელის შესახებ ინფორმაცია მიაწოდა, მალე სიკვდილით დაისჯება.

„მაჰმუდ მუსავი მაჯდის, რომელიც ცენტრალური სადაზვერვო სააგენტოსა და „მოსადის“ აგენტი იყო, სიკვდილით დასჯა მიესაჯა. მან ჩვენს მტერს წამებული სულეიმანის ადგილსამყოფელის შესახებ ინფორმაცია მიაწოდა,“- განაცხადა ირანის სასამართლო სისტემის პრესსპიკერმა გულემჰუსეინ ესმაილიმ.

შეგახსენებთ, 3 იანვარს, აშშ-ის სამხედრო ძალების მიერ ჩატარებული სპეცოპერაციის დროს ირანის ისლამური რევოლუციური გვარდიის კორპუსის „ყუდსის ძალები“ მეთაური ყასემ სულეიმანი დაიღუპა.