ბათუმში "თევზის კაფეში" დასაქმებულები აცხადებენ, რომ კაფეში ბუნებრივი აირი მოწესრიგებული იყო და სპეციალისტებმა გაზი სამი დღის წინ შეამოწმეს. მათი თქმით, კაფეს ადრე შენიშვნა ჰქონდა მიღებული და კაფეს ხელმძღვანელობამ აღნიშნული საკითხი გამოასწორა.
"კაფეში სამი დღის წინ ხელოსანი იყო მოსული და შეამოწმა. ჩვენ კარანტინის დროს არ ვმუშაობდით, 10 ათი დღეა რაც ვმუშაობთ. ხელოსანმა შეცვალა ყველაფერი. ამდენი ხანი კაფე ჩაკეტილი იყო და შეამოწმეს სპეციალისტებმა",- აცხადებენ თანამშრომლები.
ცნობისთვის, ბათუმში თევზის ბაზრობის გვერდით "თევზის კაფეში" აფეთქება მოხდა. აფეთქება დილის 06:00 საათზე, კაფის სამზარეულოს ნაწილში მოხდა.
შემთხვევის შედეგად ერთი მსუბუქი ავტომანქანა დაზიანდა.
შინაგან საქმეთა სამინისტროს ინფორმაციით, გამოძიება "სისხლის სამართლის კოდექსის" 240-ე პრიმა მუხლით დაიწყო, რაც ელექტრო ან თბოენერგიის, გაზის, ნავთობის ან ნავთობპროდუქტების ობიექტზე უსაფრთხოების წესების დარღვევას გულისხმობს.