ატმის მოსავლის  დაბინავებისა და რეალიზაციის საკითხებზე შეხვედრა გაიმართა

ატმის მოსავლის აღების, დაბინავებისა და რეალიზაციის ორგანიზებულად ჩატარების საკითხები გარემოს დაცვისა და სოფლის მეურნეობის სამინისტროს წარმომადგენლებმა გურჯაანის მუნიციპალიტეტში, ატმის გადამამუშავებელი საწარმოების ხელმძღვანელებთან და ექსპორტიორებთან გამართულ შეხვედრაზე განიხილეს. ამის შესახებ „ინტერპრესნიუსს“ გარემოს დაცვისა და სოფლის მეურნეობის სამინისტროდან აცნობეს.

მათივე ცნობით, გარემოს დაცვისა და სოფლის მეურნეობის მინისტრის მოადგილემ, სოლომონ პავლიაშვილმა კახეთის მხარეში სახელმწიფო რწმუნებულთან, ირაკლი ქადაგიშვილთან ერთად, გურჯაანის მუნიციპალიტეტის სოფელ ჩუმლაყში ის სადისტრიბუციო ლოკაცია დაათვალიერა, რომელიც კორონავირუსის პანდემიის პირობებში ატმის მოსავლის უსაფრთხო და შეუფერხებელი ექსპორტის უზრუნველყოფის მიზნით შეირჩა.

უწყების ინფორმაციით, სადისტრიბუციო ლოკაციაზე იმუშავებს ჯგუფი ფიტოსანიტარიული, გარემოს დაცვისა და სოფლის მეურნეობის სამინისტროს საინფორმაციო-საკონსულტაციო და საბაჟო სამსახურების წარმომადგენლების შემადგენლობით, რომელთა საშუალებითაც გადამზიდი მანქანების უცხო ქვეყნის მოქალაქე მძღოლები პროდუქციის რეალიზაციისთვის საჭირო დოკუმენტაციის აღებას ადგილზე, „ერთი ფანჯრის“ პრინციპით შეძლებენ. გადამზიდი მანქანების გადაადგილება გაკონტროლდება.

„წელს ატმის უხვ მოსავალს ველოდებით. საპროგნოზო რაოდენობა, დაახლოებით, 35 000 ტონაზე მეტია. წელს, სეზონზე 20 სამაცივრე მეურნეობა იმუშავებს. ახალი კორონავირუსის პანდემიური პირობებიდან გამომდინარე, გურჯაანის მუცინიპალიტეტის სოფელ ჩუმლაყის ტერიტორიაზე შევარჩიეთ ლოკაცია, სადაც მანქანები საექსპორტო პროდუქციით დაიტვირთებიან. ეპიდემიოლოგიური სიტუაციის გათვალისწინებით, მნიშვნელოვანია, ფერმერებმა, მწარმოებლებმა და ექსპორტიორებმა გაითვალისწინონ უსაფრთხოების წესები, რომლებიც აუცილებელია ვირუსის გავრცელების პრევენციისთვის. სახელმწიფო მაქსიმალურს გააკეთებს იმისათვის, რომ ფერმერებს პროდუქციის რეალიზაციის პრობლემა არ შეექმნათ“, - განაცხადა სოლომონ პავლიაშვილმა.

როგორც კახეთის მხარეში სახელმწიფო რწმუნებულმა, ირაკლი ქადაგიშვილმა სამუშაო შეხვედრაზე აღნიშნა, ქალაქ გურჯაანში არსებული საორგანიზაციო შტაბი, შექმნილ ეპიდემიოლოგიურ ვითარებაში, ატმის მოსავლის დაბინავებასთან დაკავშირებული ყველა საკითხის ოპერატიულად მოგვარების მიმართულებით იმუშავებს.

სამუშაო შეხვედრას სსიპ სურსათის ეროვნული სააგენტოს უფროსი, ზურაბ ჩეკურაშვილი და სამინისტროს სისტემაში შემავალი შესაბამისი უწყებების წარმომადგენლები ესწრებოდნენ.

კახა გოგოლაშვილი - როცა სტაბილიზაციისკენ მიმართული ნებისმიერი კონსტრუქცია ინგრევა, იქ სამოქალაქო დაპირისპირების საფრთხეც არსებობს
ქართული პრესის მიმოხილვა 29.07.2021
ლევან ალაფიშვილი - ოპოზიციამ მიუტევებელი შეცდომა დაუშვა, როცა პლებისციტი თვითმმართველობის არჩევნებზე მიბმულ პროცენტში გაცვალა
რა უპირატესობები აქვს სამსუნგის სმარტფონს ოფიციალური ჰოლოგრამით?
სიახლე PSP-სგან - ფრანგული დერმატოლოგიური კოსმეტიკის ინოვაციური ბრენდი SVR უკვე საქართველოშია
გაყინული კრემიდან „თოლიას“ რეცეპტებამდე, ანუ ყველაფერი, რაც ნაყინის შესახებ უნდა იცოდე