„ფეისბუქმა“, „გუგლმა“ და „ტვიტერმა“ „ფეიკ ნიუსთან“ ბრძოლის შესახებ ყოველთვიური ანგარიშები უნდა წარმოადგინონ, - ამის შესახებ ევროკომისიის ვიცე-პრეზიდენტმა ვერა ჟუროვამ განაცხადა.

„დეზინფორმაცია არა მარტო ჩვენი დემოკრატიის სიჯანსაღეს, არამედ ჩვენი მოქალაქეების ჯანმრთელობასაც აზიანებს. მას ეკონომიკაზე უარყოფითი ზეგავლენის მოხდენა, ხელისუფლების მხრიდან რეაგირების ძირის გამოთხრა და შესაბამისად, ჯანდაცვის სფეროში მიღებული ზომების შესუსტება შეუძლია, ”- განაცხადა ჟუროვამ პრესკონფერენციაზე.

მისივე თქმით, „ფეიკ ნიუსების“ „ფრონტმა“ კორონავირუსის ვაქცინაციის საკითხზე გადაინაცვლა. ვერა ჟუროვამ განმარტა, რომ ონლაინ პლატფორმებმა „ფეიკ ნიუსების“ წინააღმდეგ ბრძოლის შესახებ ყოველთვიური ანგარიშები უნდა წარმოადგნონ და ამ გზით, ხელი შეუწყონ კორონავირუსთან დაკავშირებით გავრცელებული დეზინფორმაციისა და რეკლამების შეზღუდვას.

ევროკომისიის ვიცე-პრეზიდენტმა ასევე განაცხადა, რომ ვიდეო აპლიკაცია „ტიკ ტოკი“ „ფეისბუქის“, „გუგლის“, „ტვიტერისა“ და „მოზილას“ მიერ ხელმოწერილ ქცევის კოდექსს შუერთდება.