ქუთაისში, „ჭომის“ დასახლებაში, სპორტული კომპლექსის რეაბილიტაცია მიმდინარეობს

ქუთაისში, „ჭომის“ დასახლებაში, სპორტული კომპლექსის რეაბილიტაცია მიმდინარეობს. ქუთაისის მერიის ცნობით, სარეაბილიტაციო სამუშაოები ქალაქის მერის მოვალეობის შემსრულებლმა დავით ერემეიშვილმა და უქიმერიონის მაჟორიტარმა დეპუტატმა ამირან კოპალეიშვილმა დაათვალიერა.

„სპორტული კომპლექსის ნაწილობრივი რეაბილიტაცია - რეკონსტრუქცია ითვალისწინებს მარტივი ტიპის გასახდელების, სველი წერტილების, ორიარუსიანი ტრიბუნების და სანიაღვრე არხის მოწყობას. შეიცვლება განათების სისტემაც. მოედნის მოცულობა საშუალებას იძლევა საწვრთნელი პროცესის დროს მოემსახუროს 30 პერსონას, ღონისძიებების დროს კი 200 ადამიანს. სპორტული მოედნის სარეაბილიტაციო სამუშაოებს, რომლის ღირებულება 111800 ლარია, შპს „თეგიკა უნივერსალი“ ასრულებს. რეაბილიტაცია ივლისში დასრულდება“,- აღნშნულია ინფორმაციაში.

„ჭომის“ დასახლებაში ეს მოედანი ათწლეულების მანძილზე არსებობდა, თუმცა თანამედროვე მოთხოვნებს ვერ აკმაყოფილებდა. სწორედ ამიტომ გადავწყვიტეთ მისი რეაბილიტაცია. სამუშაოების დასრულების შემდეგ სპორტული კომპლექსი იქნება კეთილმოწყობილი, კომფორტული და ხელმისაწვდომი ამ უბნის ყველა მაცხოვრებლისთვის“ , - აცხადებს მერის მოვალეობის შემსრულებელი დავით ერემეიშვილი.