აჭარის ტელევიზიისა და რადიოს შენობასთან საზოგადოება "მე მიყვარს ბათუმის" წევრმა ალექსანდრე მილორავამ 15 დღიანი შიმშილის შემდეგ პროტესტი შეწყვიტა. ალექსანდრე მილორავას განცხადებით, იგი არხის მრჩეველთა საბჭოს მოუწოდებს, რომ იმოქმედონ თავისუფლად და აჭარის ტელევიზიის დირექტორი გიორგი კოხრეიძე თანამდებობიდან გადააყენონ. ალექსანდრე მილორავა აცხადებს, აჭარის ტელევიზია ხელისუფლების გავლენებისგან უნდა გათავისუფლდეს.

"დღეს შიმშილობის მე-15 დღეა, მოგეხსენებათ რომ აჭარის უმაღლეს საბჭოში დაიძრა ბორდის დათხოვნასთან დაკავშირებით საკითხი. მიმდინარეობს კონსულტაციები სხვადასხვა დეპუტატებთან. ჩემთვის მნიშვნელოვანია, რომ აჭარის მაუწყებელში პოლიტიკური პროცესები შეწყდეს და ხელისუფლების კონტროლი დასრულდეს. ვწყვეტ შიმშილობას და ბორდს ვაძლევ საშუალებას, იმოქმედოს თავისუფლად და თანამდებობიდან გაათავისუფლოს არხის დირექტორი გიორგი კოხრეიძე. წინააღმდეგ შემთხვევაში აჭარის მაუწყებლის მრჩეველთა საბჭოს პასუხისმგებლობა აჭარის უმაღლეს საბჭოში დადგება და ბრძოლას გავაგრძელებთ იქ",- განაცხადა მილორავამ.

ალექსანდრე მილორავას განცხადებით, გიორგი კოხრეიძე არხზე კრიტიკულად განწყობილ ჟურნალისტებს დევნის და სამსახურიდან უსაფუძვლოდ ათავისუფლებს.