ოპოზიციას პოლიტიკური ძირი უკვე დიდი ხანია გამძვრალი აქვს , - ამის შესახებ თავდაცვისა და უშიშროების კომიტეტის თავმჯდომარე ირაკლი სესიაშვილმა პარლამენტის პლენარულ სხდომაზე სიტყვით გამოსვლისას განაცხადა.

მისი თქმით, რადიკალურ ოპოზიციას არ აქვს ეროვნული ინტერესების გარშემო გაერთიანების არც სურვილი და არც გამბედაობა. გარდა ამისა, მან ოპონენტებს „პოლიტიკური დეზერტირები“ უწოდა.

„ბატონო ირაკლი, განსაკუთრებით ბატონო გენერლებო, გული არ გეტკინოთ, რომ ასეთ ხალხს გაუხარდეს, რომ ყველაზე მაღალი ხარისხის სამხედრო ფეხსაცმელს ძირი გასძვრეს. გული არ გეტკინოთ მათი ასეთი შეფასება იმიტომ, რომ მათ პოლიტიკური ძირი უკვე დიდი ხანია გამძვრალი აქვთ. როცა ვსაუბრობ ეროვნული ინტერესების გარშემო გაერთიანებას, სამწუხაროდ, ჩვენს ამ რადიკალურ ოპონენტებს არ აქვთ ამის არც სურვილი, არც გამბედაობა. გამბედაობაზე გამახსენდა ჩემთვის ყველაზე დიდი გულისტკივილი - მე მაშინ უფლებადამცველი ვიყავი და სამხედრო მოსამსახურეების უფლებებს ვიცავდი, როცა ოკუპანტთან მებრძოლი ჩვენი ჯარისკაცები დეზერტირებად შერაცხეს. მე მინდა მათ ვუთხრა: საქართველოს სამხედრო დეზერტირები არ ჰყავს, მას ჰყავს პოლიტიკური დეზერტირები“, - განაცხადა სესიაშვილმა.