თავდაცვის მინისტრი და აშშ-ის ელჩი RSM-ის გადასროლისწინა მომზადების საჩვენებელ სწავლებას დაესწრნენ

ავღანეთში ნატო-ს ეგიდით მიმდინარე მტკიცე მხარდაჭერის მისიის (RSM) გადასროლისწინა მომზადების ამოცანის რეპეტიციის წვრთნა (MRE), ამერიკელ სამხედროებთან ერთად, წელს პირველად გერმანიის ნაცვლად საქართველოში ჩატარდა. ამის შესახებ „ინტერპრესნიუსს“ თავდაცვის სამინისტროდან აცნობეს.

მათივე ინფორმაციით, საქართველოს თავდაცვის მინისტრი ირაკლი ღარიბაშვილი აშშ-ის ელჩთან კელი დეგნანთან ერთად ვაზიანში იმყოფებოდა, სადაც საერთაშორისო მისიისთვის მომზადების პროცესს გაეცნო, საჩვენებელ სწავლებას დაესწრო და სამხედრო მოსამსახურეებს წარმატებული საერთაშორისო მისია უსურვა.

თავდაცვის მინისტრის განცხადებით, ეს კიდევ ერთი ნათელი მაგალითია, რომ უწყებას გააჩნია ყველანაირი რესურსი და შესაძლებლობა, რომ საერთაშორისო დონის წვრთნები საქართველოს ტერიტორიაზე წარმატებით ჩაატაროს. დღემდე, ქართველი სამხედრო მოსამსახურეები საერთაშორისო მისიისთვის მზადების ბოლო ეტაპს გერმანიაში გადიოდნენ, სადაც მათი საბოლოო შეფასება ხდებოდა. დღეს კი, აღნიშნული წვრთნები უკვე საქართველოს თავდაცვის ძალების ბაზაზე ჩატარდა.

სტუმრებს თავდაცვის ძალების წარმომადგენლებმა მისიისთვის მომზადების დეტალები გააცნეს, რის შემდეგაც სპეციალურად მათთვის საჩვენებელი სწავლება გაიმართა, რომელიც კორდონისა და ჩხრეკის ოპერაციას მოიცავდა. წვრთნის დროს სამხედრო მოსამსახურეებმა დაჭრილების ევაკუაცია „იროკეზის“ საშუალებით განახორციელეს. ამ ეტაპზე საერთაშორისო მისიაში მონაწილეობის მისაღებად პირველი ქვეითი ბრიგადის მე-13 ქვეითი ბატალიონი ემზადება. სწავლებას თავდაცვის ძალების წარმომადგენლები და აშშ-ის თავდაცვის ატაშე, პოლკოვნიკი სტეფანი ბეგლიც დაესწრნენ.

თავდაცვის სამინისტროს ინფორმაციით, დასკვნით წვრთნებში, რომელიც 4-თვიანი ინტენსიური მომზადების ბოლო კომპონენტია, მონაწილეობა დაახლოებით 600-მა სამხედრო მოსამსახურემ მიიღო. დღემდე გადასროლის პროგრამის ფარგლებში დაახლოებით 18 000 ქართველმა სამხედრომ გაიარა შესაბამისი წვრთნა და ამერიკელებთან ერთად იმსახურა ISAF-ის და RSM-ის ოპერაციებში.

იოსებ ბარათაშვილი - ახლა მთავარია, გამოძიებამ უტყუარად დაადგინოს იმ პირების ვინაობა, რომელთა ქმედებამაც გამოიწვია შაქარაშვილის გარდაცვალება
ქართული პრესის მიმოხილვა 10.07.2020
ალექსეი მალაშენკო - ვინც არ უნდა მოიგოს საქართველოს არჩევნებში, აფხაზეთისა და სამხრეთ ოსეთის საკითხებში არაფერი შეიცვლება, ამიტომ, კრემლისთვის პრინციპული მნიშვნელობა არ აქვს, ვინ გაიმარჯვებს
ყაზახეთ-საქართველოს თანამშრომლობის ახალი ეტაპი იწყება
სუბსიდირებული იპოთეკური სესხი - ახალი შესაძლებლობა ტერაბანკისგან
სილქნეტის მობილური აბონენტები თიბისის მობაილბანკით სარგებლობას ინტერნეტის დახარჯვის გარეშე შეძლებენ