საპარლამენტო არჩევნების ჩასატარებლად საუკეთესო ვარიანტი იქნებოდა გვიანი გაზაფხული, ზაფხულის დასაწყისი, ან ოპტიმალური შეიძლებაყოფილიყო ადგილობრივი თვითმმართველობის არჩევნებთან გაერთიანება - ამის შესახებ ფრაქცია "დამოუკიდებელი დეპუტატების" თავმჯდომარე მარიამ ჯაშმა ჟურნალისტებთან, არჩევნების ჩატარების თარიღის შესაძლო გადაწევასთან დაკავშირებით განაცხადა.
მისი თქმით, ეს მისი პირადი პოზიციაა, ხოლო საკითხთან დაკავშირებით ფრაქციის ერთიან მოსაზრებას ხვალ გაახმოვანებენ.
"როგორც ჯანდაცვის ექსპერტი სრული პასუხისმგებლობით გიცხადებთ, რომ პანდემიის მეორე ტალღის მოსალოდნელი ეფექტიდან გამომდინარე, ჩვენ ვერ შევძლებთ უზრუნველვყოთ თავისუფალი და თანაბარი საარჩევნო გარემო. პირიქით, ხელისუფლების ხელში რჩება ბერკეტი, რომ პანდემიის გამწვავების ან მეორე ტალღის ფონზე, თუნდაც, ერთი საეჭვო შემთხვევის აღმოჩენის შემთხვევაში, მოხდეს კონკრეტული საარჩევნო უბნის იზოლირება, დაკეტვა და ამან შეიძლება ბევრად მეტი კითხვა გააჩინოს ლეგიტიმაციასთან დაკავშირებით. ამდენად თუკი იქნება მსჯელობა ვადის გადაწევასთან დაკავშირებით, ეს არ უნდა მოხდეს ერთპარტიულად და ცალმხრივად. „ქართულმა ოცნებამ“ ახლა მაინც, ამ საკითხთან დაკავშირებით უზრუნველყოს საერთაშორისო პარტნიორების ჩართულობით საერთო მაგიდის გარშემო მსჯელობა. თუკი დეკემბერზე იქნება ჩამოყალიბებული პოზიცია, ეს იქნება კიდევ ერთი ნიშანი, რომ 6 თვეზე გადანაწილებული სოციალური დახმარებები პირდაპირ არის მათი საარჩევნო კამპანიის ნაწილი. ვიმსჯელოთ, როგორც ჯანდაცვის ინტერესებიდან და სფეროს ექსპერტიზიდან გამომდინარე. შემიძლია დაგიდასტუროთ, რომ 2 ტალღას შორის პერიოდი, თუნდაც, დეკემბერი ამ შემთხვევაში, შეიძლება იყოს გონივრული, მაგრამ ზამთარი ყოველთვის არის მძიმე რესპირატორული ინფექციებიდან გამომდინარე, საუკეთესო ვარიანტი იქნებოდა გვიანი გაზაფხული, ან ზაფხულის დასაწყისი, ან ოპტიმალური შეიძლება ყოფილიყო საერთოდ, რადგან მომავალ წელს იგეგმება ადგილობრივი თვითმმართველობის არჩევნები, გაერთიანება, ეს არის მხოლოდ და მხოლოდ ჩემი პირადი მოსაზრება", - განაცხადა ჯაშმა.