ქართველმა მხარემ ჩორჩანას დასახლებული პუნქტის ჩრდილო-აღმოსავლეთით, წნელისთან ახლოს პოლიციის კიდევ ერთი საგუშაგო მოაწყო, - ამის შესახებ ინფორმაციას “სპუტნიკ-ოსეთია” ოკუპირებული ცხინვალის ე.წ. ეროვნული უსაფრთხოების კომიტეტის პრესსამსახურზე დაყრდნობით ავრცელებს.

მათივე თქმით, „თბილისის რეჟიმმა“ ბროლოსანი-ჩორჩანას 3-კილომეტრიანი გზის მშენებლობის დაწყების შესახებ განცხადება გააკეთა, ეს გზა კი „ქართულ მხარეს“ ტერიტორიაზე დამატებითი ძალების სწრაფად დისლოცირების საშუალებას მისცემს.

კიდევ ერთი ბრალდება, რაც ე.წ. ეროვნული უსაფრთხოების კომიტეტმა ცენტრალური ხელისუფლების მიმართ გააჟღერა ისაა, რომ „ქართულმა თვითმფრინავმა“ ე.წ.“ საზღვართან“ ძალიან ახლოს „რეკოგნისცირების მიზნით გადაფრენა განახორციელა.“

„მიუხედავად იმისა, რომ „ცხელი ხაზი“ ავამოქმედეთ, ამ გადაფრენის მიზნისა და მიზეზის შესახებ პასუხი არც საქართველოს მხრიდან და არც ევროკავშირის სადამკვირვებლო მისიის მხრიდან მიგვიღია,“- ნათქვამია ინფორმაციაში.