"გაერთიანებული ოპოზიციის" წევრი მურმან დუმბაძე, ხულიგნობის ბრალდებით დაკავებულის რეზო წულუკიძის ძმის - ფირუზ წულუკიძის განცხადების გამო, გამოძიების დაწყებას მოითხოვს. როგორც მან პარტიის ოფისში გამართულ ბრიფინგზე განაცხადა, აჭარის მთავრობის თავმჯდომარის თორნიკე რიჟვაძის მამა დავით რიჟვაძე, წულუკიძეებს პირდაპირ სთხოვდა, რომ არჩევნებზე "ქართული ოცნების" სასარგებლოდ ემუშავა. მისი თქმით, უარის მიღების შემდეგ რეზო წულუკიძე დააკავეს.
მურმან დუმბაძის განმარტებით, ხელისუფლება ადამიანებს პოლიტიკური ნიშნით იჭერს.
"2011 წლის მაისში, როცა აჭარის ტელევიზიასთან დაარბიეს ოპოზიციის აქცია, ამას ხელმძღვანელობდა დავით რიჟვაძე, ვისი წყალობითაც 7 ადამიანი დააკავეს, მე ივანიშვილთან პირადად მქონდა საუბარი, რომ ასეთი მოძალადე პირები არ ყოფილიყვნენ საჯარო სივრცეში, მაგრამ პირიქით, დააწინაურეს 2012-ში და გახდა ხელვაჩაურის პოლიციის უფროსი. ამ სიტუაციის წინააღმდეგ უნდა გავერთიანდეთ პოლიტიკური ძალები", - აცხადებს მურმან დუმბაძე.