„ერთიანი ნაციონალური მოძრაობის“ თავმჯდომარის, გრიგოლ ვაშაძის განცხადებით, იმერეთში კაშხლის მშენებლობა მთელ დასავლეთ საქართველოს საფრთხის წინაშე დააყენებს.

„საშინელი საფრთხის ქვეშ შეიძლება დადგეს მთლიანად დასავლეთ საქართველო. ხელისუფლება ამაზე გვპასუხობს, რომ თითქოს ჩვენ საქართველოს ენერგოდამოუკიდებლობის წინააღმდეგები ვართ და ამას ეუბნებიან იმ პარტიას, რომელმაც საქართველოში დენი, გათბობა დააბრუნა. ჩვენ არ ვართ საქართველოს ენერგოდამოუკიდებლობის წინააღმდეგები, პირიქით, გვინდა, რომ ენერგიის ექსპორტის დიდი შესაძლებლობა გვქონდეს, მაგრამ კატეგორიული წინააღმდეგები ვართ, რომ შესაბამისი სეისმური და ტექნიკური ექსპერტიზის გარეშე დაიწყოს მშენებლობა და შეირჩეს ისეთი ადგილი, რომელზეც სეისმოლოგებიც და ეკოლოგებიც იძახიან რომ უზარმაზარ საფრთხეს წარმოადგენს იმერეთისთვის”, - განაცხადა ვაშაძემ.