საკონსტიტუციო სასამართლოში მოსამართლის ვასილ როინიშვილის ფიცის დადების ცერემონიალის პარალელურად საპროტესტო აქცია მიმდინარეობდა. აქციაზე პარტია “ლელოს” წევრები და არასამთავრობო ორგანიზაცია "ალტერნატივას" წარმომადგენლები საყვირებით მივიდნენ.

აქციის მონაწილეები საქართველოს პრეზიდენტთან სალომე ზურაბიშვილთან შეხვედრას ითხოვენ, რომელიც საკონსტიტუციო სასამართლოში ფიცის დადების ცერემონიალს ესწრებოდა.

აქციის მონაწილეები აცხადებენ, რომ დღეს საქართველოს საკონსტიტუციო სასამართლო საბოლოოდ ჩამოიშალა, რადგან სასამართლოში ადეიშვილი დაბრუნდა.

"ვასილ როინიშვილის დანიშვნა საკონსტიტუციო სასამართლოში ნიშნავს ადეიშვილის დაბრუნებას სასამართლოს სისტემაში და არის ღალატი კონსტიტუციისა და სახელმწიფოსი“, - აცხადებს პარტია "ლელოს" აჭარის ორგანიზაციის ლიდერი ირაკლი კუპრაძე.

პროტესტის ნიშნად აქციის მონაწილებმა საკონსტიტუციო სასამართლოსთან ლობიო მიიტანეს.

"20 ივნისის ღამეს ახალგაზრდებს თვალებს თხრიდნენ, სალომე ზურაბიშვილო სალობიეში დადიოდა. როცა გიორგი გაბუნიამ განცხადება გააკეთა, სალომე ზურაბიშვილმა პუტინს ბოდიში მოუხადა. ეს ნიშნავს, რომ სალომე ზურაბიშვილი მსახურია რუსეთის",- განაცხადეს არასამთავრობო ორგანიზაცია „ალტერნატივას“ წევრებმა.