მამუკა მდინარაძე "ნაციონალურ მოძრაობასა" და "ევროპულ საქართველოს" მოუწოდებს, გააკეთონ მკაფიო განცხადება, აპირებენ თუ არა ელჩების მოწოდების გაზიარებას

საპარლამენტო უმრავლესობის ლიდერი მამუკა მდინარაძე "ნაციონალურ მოძრაობასა" და "ევროპულ საქართველოს" მოუწოდებს, გააკეთონ მკაფიო განცხადება, აპირებენ თუ არა 8 მარტის მოლაპარაკების ფასილიტატორი ელჩების მოწოდების გაზიარებას და საკონსტიტუციო ცვლილებების კენჭისყრაში მონაწილეობას.

მდინარაძის შეფასებით როგორც ქართულმა საზოგადოებამ, ასევე საერთაშორისო პარტნიორებმა უნდა იცოდნენ, ოპოზიცია ქართული დემოკრატიის განვითარებას აძლევს თუ არა ხმას. მისივე შეფასებით, ეს რადიკალური ოპოზიციისთვის კიდევ ერთი ტესტი იქნება.

"დღეს ჩვენ ვნახეთ ფასილიტატორი ელჩების განცხადება, სადაც ხელშეკრულების ხელმომწერ ყველა მხარეს მოუწოდებენ, მიიღონ კენჭისყრაში მონაწილეობა და შეასრულონ 8 მარტს გაფორმებული შეთანხმება. "ნაციონალური მოძრაობის" და "ევროპული საქართველოს" წარმომადგენლები დღემდე უარს აცხადებენ საკონსტიტუციო ცვლილებების კენჭისყრაში მონაწილეობასა და მხარდაჭერაზე. ელჩების ამ განცხადებამ სპეკულაციებისთვის ყოველგვარ სივრცეს წერტილი დაუსვა. ოპოზიციას მოვუწოდებ, რომ მკაფიოდ და ხაზგასმით, კონკრეტულად ამ კენჭისყრასთან დაკავშირებით, თავიანთი პოზიცია დააფიქსირონ და პასუხი გასცენ მთავარ კითხვას: იმ ელჩების მოწოდებას, რომლებიც ფასილიტაციას უწევდნენ მოლაპარაკებებს, ასრულებენ თუ არა? თუ ისინი ამ მოწოდებასაც დააიგნორებენ და მაინც არ მიიღებენ კენჭისყრაში მონაწილეობას, ამაზე პასუხი უნდა იყოს ცალსახა, ყოველგვარი მიკიბვ-მოკიბვის გარეშე, რათა ქართულმა საზოგადოებამ, საერთაშორისო საზოგადოებამ, ჩვენმა პარტნიორებმა საბოლოოდ იცოდნენ მათი გადაწყვეტილების შესახებ: უერთდებიან თუ არა ისინი 8 მარტის შეთანხმებას, ქართული დემოკრატიის განვითარებას ხმას აძლევენ თუ ამ შემთხვევაშიც, პირდაპირი მოწოდების მიუხედავად, მაინც არ აპირებენ კანონპროექტის მხარდაჭერას. ეს ჩვენი რადიკალური ოპოზიციისთვის კიდევ ერთი ტესტი იქნება.

როდესაც 140-150 დეპუტატი განაცხადებს, რომ კანონპროექტს მხარს დაუჭერს, აქ რისკი დაყვანილია მინიმუმის მინიმუმამდე. ამ შემთხვევაში კი როდესაც მაქსიმუმ 117 ხმა გვაქვს დათვლილი, თეორიული რისკი მაინც არსებობს, რომელიც ასევე უნდა გამოვრიცხოთ," - განაცხადა მდინარაძემ.

ცნობისთვის, ხელისუფლებასა და ოპოზიციას შორის გამართული დიალოგის ფასილიტატორი ელჩები ერთობლივ განცხადებას ავრცელებენ, სადაც შეთანხმების ყველა ხელმომწერს საკონსტიტუციო ცვლილებების კენჭისყრაში მონაწილეობისკენ მოუწოდებენ.

ლევან ალაფიშვილი - ოპოზიციამ მიუტევებელი შეცდომა დაუშვა, როცა პლებისციტი თვითმმართველობის არჩევნებზე მიბმულ პროცენტში გაცვალა
ქართული პრესის მიმოხილვა 26.07.2021
ვლადიმერ ფესენკო - უკრაინის გარეშე უკრაინის მომავალზე შეთანხმების ნებისმიერი მცდელობები დამარცხებისთვისაა განწირული
ბათუმში „მაგნიტის“ ახალი ფორმატის ფილიალი - „მაგნიტი მაქსი“ გაიხსნა
რომში “ინტელიექსპრესის” ახალი ფილიალი გაიხსნა
საფრანგეთის განვითარების საფინანსო ინსტიტუტი პროპარკო (Groupe Agence Française de Développement) კრედო ბანკის აქციონერი გახდა
„ემბავუდმა“ ოქროს ბრენდის წოდება მოიპოვა