აბსოლუტურად დარწმუნებული ვარ, რუსეთთან თანასწორი, პატივისცემაზე დაფუძნებული და წრფელი ურთიერთობების აღდგენა საქართველოსა და ქართველების ეროვნულ ინტერესებშია, - ამის შესახებ რუსი დეპუტატი სერგეი გავრილოვი 20 ივნისის მოვლენებთან დაკავშირებით გავრცელებულ ვიდეო მიმართვაში აცხადებს.
მისივე თქმით, დარწმუნებულია, რომ რუსებისა და ქართველების უმრავლესობას ერთმანეთის მიმართ ჯანსაღი გრძნობები ამოძრავებთ.
„დარწმუნებული ვარ, რომ უმეტესობა ჩვენგანს აბსოლუტურად ჯანსაღი გრძნობები გვამოძრავებს - ძმობა, ერთობა, ჩვენი საერთო ხვედრი, დიდი მართლმადიდებლური მემკვიდრეობა,“- აღნიშნა გავრილოვმა.
მისივე თქმით, რუსეთ-საქართველოს ურთიერთობის აღსადგენად ყველამ თავის წვლილი უნდა შეიტანოს.
„მესმის, რომ რთული წელი იყო, მათ შორის შარშანდელი მოვლენები, პანდემია და კრიზისი. თითოეულმა ჩვენგანმა თუნდაც მცირე ნაბიჯი უნდა გადავდგათ, რომ ეს რთული მდგომარეობა გადავლახოთ,“- აღნიშნა გავრილოვმა.