"ევროპული საქართველო" დღეს, მონაწილეობას მიიღებს და მხარს დაუჭერს პირველი მოსმენით საკონსტიტუციო ცვლილებებს, მაგრამ ხაზს ვუსვამ, პირველი მოსმენით და არა მეორე და მესამე მოსმენით, რადგან 8 მარტის შეთანხმება არ შესრულებულა , - ამის შესახებ "ევროპული საქართველოს" ლიდერმა დავით ბაქარაძემ ჟურნალისტებს პარლამენტში საკონსტიტუციო ცვლილებების განხილვის დაწყებამდე განუცხადა.

ბაქრაძის თქმით, მეორე და მესამე მოსმენაზე "ევროპული საქართველოს" პოზიცია ცალსახად და უპირობოდ დამოკიდებული იქნება იმაზე, რომ შესრულდება, თუ არა 8 მარტის შეთანხმება და გათავისუფლდება, თუ არა ციხიდან "მთავარი არხის" ერთ-ერთი მეწილე გიორგი რურუა.

"მაგრამ დღევანდელი ხმის მიცემით ჩვენ ვიგებთ ორ ამოცანას. პირველი, ჩვენ "ქართულ ოცნებას" საშუალებას არ მივცემთ გაიმეოროს ნოემბრის სცენარი, როდესაც ყველას ზურგს უკან, თითქოს რამდენიმე დეპუტატის წინააღმდეგობის გამო ჩავარდა პროპორციული სისტემა. მეორე - პირველი მოსმენისას გატანით ჩვენ გარკვეულ პერიოდს მოვიგებთ, მინიმუმ რამდენიმე დღეს, რომლის განმავლობაშიც მუშაობას გავაგრძელებთ ჩვენს უცხოელ პარტნიორებთან, რომ ხელისუფლებამ შეასრულოს 8 მარტის შეთანხმება და გაათავისუფლოს გიორგი რურუა. ამიტომ ვფიქრობ, რომ დღევანდელი გადაწყვეტილება არის სწორი გადაწყვეტილება, რომელიც, ერთი მხრივ, "ქართულ ოცნებას" საშუალებას არ მისცემს კიდევ ერთხელ ჩააგდოს პროპორციული სისტემა და მეორე მხრივ, გვიტოვებს იმის შანსს და პერსპექტივას, შესრულდეს 8 მარტის შეთანხმება და გათავისუფლდეს რურუა. ასე რომ, პასუხისმგებლობა ამის შემდეგ, მთლიანად ხელისუფლების მხარესაა , - განაცხადა ბაქრაძემ.