„თავისუფალი საქართველოს“ ლიდერმა კახა კუკავამ ზუგდიდში, პარტიის სხვა წევრებთან ერთად, მხარდამჭერებთან შეხვედრა გამართა.

როგორც „ინტერპრესნიუსს“ „თავისუფალი საქართველოდან“ აცნობეს, პარტიის ლიდერმა ზუგდიდის მოსახლეობას მოახლოებულ საპარლამენტო არჩევნებთან დაკავშირებული გეგმები და დასახული ამოცანები გააცნო.

მათივე ინფორმაციით, „თავისუფალი საქართველო“ არ მონაწილეობს ე.წ. „საერთო მაჟორიტარების ფორმატში“ და კანდიდატების წარდგენას 30-ვე ოლქში დამოუკიდებლად გეგმავს. პარტია მაჟორიტარი კანდიდატების დასახელებას სხვადასხვა ოლქებში ივლისიდან დაიწყებს.

კუკავამ მხარდამჭერებს კიდევ ერთხელ აუწყა, რომ პარტიის მთავარი ამოცანა არჩევნებზე არსებული ლიბერალური პოლიტიკის სისტემური ცვლილება იქნება. მისი განცხადებით, „თავისუფალი საქართველო“ ერთგულად ინარჩუნებს, როგორც „ქართული ოცნებისგან“, ისე „ნაციონალური მოძრაობისგან“ დისტანცირების კურსს და პარტია გამორიცხავს რომელიმე ამ ძალასთან რაიმე ფორმით თანამშრომლობას.

„ჩვენ ქვეყნისთვის თანაბარ საფრთხედ განვიხილავთ, როგორც „ნაციონალური მოძრაობის“ რეჟიმის მობრუნებას ხელისუფლებაში, ისე „ქართული ოცნების“ ერთპარტიული მმართველობის შენარჩუნებას. ჩვენი მიზანია, არჩევნებზე მოვახდინოთ იმ ამომრჩევლის მხარდაჭერის კონცენტრირება, რომელიც არც „ქოცებს“ და არც „ნაცებს“ არ ირჩევს და სურს რეალურად ახალი, ეროვნული პოლიტიკური ძალების ხილვა საკანონმდებლო ორგანოში“, - განაცხადა კახა კუკავამ.