გორგასლის ქუჩაზე, #5-სა და #6-ში მდებარე კორპუსებს შორის გასართობი სივრცის მოწყობა მიმდინარეობს, - ამის შესახებ ინფორმაციას გორის მერია ავრცელებს.
მათივე ინფორმაციით, მიმდინარე სამუშაოები გორის მერმა კონსტანტინე თავზარაშვილმა დაათვალიერა.
„პროექტი, რომელიც „სამოქალაქო ბიუჯეტის ფარგლებში“ ხორციელდება, ადგილობრივმა მოსახლეობამ ხმათა უმრავლესობით შეარჩია. სამუშაოების ღირებულება 50 977 ლარია. პროექტის მიხედვით სკვერში მოეწყობა საფეხმავლო, გარე განათება, ატრაქციონები, დაიდგმება დეკორატიული სკამები. „სამოქალაქო ბიუჯეტის“ ფარგლებში 2020 წელს მუნიციპალიტეტის ადმინისტრაციული ერთეულებისთვის, მათ შორის კომბინატისთვისაც ადგილობრივი ბიუჯეტიდან 100 ათასი ლარი გამოიყო. აღნიშნული თანხით ადგილობრივმა მოსახლეობამ ორი ინფრასტრუქტურული პროექტის განხორციელება გადაწყვიტა. გარდა გორგასლის ქუჩისა, სკვერის მოწყობა თარხნიშვილის ქუჩაზეც დაიგეგმა. აღსანიშნავია, რომ გორგასლის ქუჩაზე #5-სა და #6-ში მდებარე კორპუსებს შორის 2019 წელს „სამოქალაქო ბიუჯეტის“ ფარგლებში ტრენაჟორებიც მოეწყო,“-ნათქვამია ინფორმაციაში.