ბადრი ჯაფარიძე - ჭიათურა მსოფლიოს მიზიდულობის ცენტრი უნდა გახდეს

“ლელო საქართველოსთვის” ლიდერი, ბადრი ჯაფარიძე ჭიათურაში ადგილობრივებს შეხვდა.

როგორც “ინტერპრესნიუსს” “ლელო საქართველოდან” აცნობეს, შეხვედრაზე ჯაფარიძემ განაცხადა, რომ ჭიათურა არის ადგილი, საიდანაც დაიწყება ეკონომიკური კრიზისის დასასრული.

“ლელოს” ოფისის გახსნა არ არის მხოლოდ პარტიული მოვლენა, ეს არის ადგილი, სადაც დაიწყება ამ ქალაქის უწყვეტი ეკონომიკური კრიზისის დასასრულის დასაწყისი. ჭიათურა მსოფლიოში ერთადერთი ადგილია, სადაც ლანდშაფტი, არქიტექტურა და ინდუსტრიული მემკვიდრეობა ერთიან და უნიკალურ სისტემას წარმოადგენს და არაჩვეულებრივ მოსახლეობასთან ერთად, უკიდეგანო გაჭირვებაში იმყოფება”, - განაცხადა ბადრი ჯაფარიძემ.

“ლელო საქართველოს” ერთ-ერთმა ლიდერმა ჭიათურის განვითარების გეგმაზეც ისაუბრა და აღნიშნა, რომ ჭიათურა მსოფლიოს მიზიდულობის ცენტრი უნდა გახდეს. ბადრი ჯაფარიძის განცხადებით რეგიონში უფუნქციოდ დარჩენილი ინდუსტრიული მემკვიდრეობა, საუკეთესო შესაძლებლობაა შემოქმედებითი ინდუსტრიების განვითარებისთვის.

“ჭიათურა მსოფლიოს მიზიდულობის ცენტრი უნდა გახდეს. ეს არის ქალაქი, სადაც ინგლისელებმა, თბილისზე და ბათუმზე გაცილებით ადრე, პირველი ჩოგბურთის კორტი ააშენეს საქართველოში; ქალაქი, სადაც დღეს განვითარების და სიახლის კვალი აღარ არსებობს. ჭიათურა არ არის მხოლოდ მარგანეცი, ეს არის განუმეორებელი ლანდშაფტი, ევროპაში აღიარებული და განადგურების პირას მყოფი საჰაერო საბაგირო ქსელი, გამორჩეული მღვიმევის მონასტერი, კაცხის სვეტი და კაცხის მონასტერი. ჭიათურა არის ბუნება და უფუნქციოდ დარჩენილი ინდუსტრიული მემკვიდრეობა, რომელიც საუკეთესო შესაძლებლობაა შემოქმედებითი ინდუსტრიების განვითარებისთვის”, - აღნიშნა ჯაფარიძემ.

ბადრი ჯაფარიძის თქმით, რეგიონი უნდა მომზადდეს ტურისტული პოტენციალის გაზრდისთვის, რაც მხარეს ეკონომიკურად გააძლიერებს და ახალგაზრდების საკუთარ რეგიონში დაბრუნებასა და დასაქმებას უზრუნველყოფს.

ზაზა ფირალიშვილი - არ ჩანს დიდი იდეა, არ ჩანან პოლიტიკური აქტორები, რომლებიც თავისი გადამდები ენთუზიაზმით და ენერგიით „აამოძრავებდნენ“ საზოგადოებას
თორნიკე ჯანაშვილი - “რეფორმერი" პოლიტიკაში მოდის
ქართული პრესის მიმოხილვა 14.07.2020
ალექსეი მალაშენკო - ვინც არ უნდა მოიგოს საქართველოს არჩევნებში, აფხაზეთისა და სამხრეთ ოსეთის საკითხებში არაფერი შეიცვლება, ამიტომ, კრემლისთვის პრინციპული მნიშვნელობა არ აქვს, ვინ გაიმარჯვებს
ტერაბანკის ინოვაციური ბოტის საკომუნიკაციო კამპანიამ საერთაშორისო აღიარება მოიპოვა