რუსთავის “ცხელების ცენტრში” მყოფ 84 წლის ქალს კორონავირუსი დაუდგინდა. როგორც “ინტერპრესნიუსთან" საუბარში რუსთავის ცენტრალური საავადმყოფოს დირექტორმა პაპუნა ბახტაძემ განაცხადა, ქალი, კლინიკის “ცხელების ცენტრში” საკარანტინე სივრციდან ,,კოვიდ19"-ის დამახასიათებელი სიმპტომებით შეიყვანეს.

"ქალის ინფიცირების წყარო ცნობილია, გასულ კვირას მის მეუღლეს დაუდასტურდა კორონავირუსი, ის საქართველოში სომხეთიდან შემოვიდა. 84 წლის ქალი რუსთავში ერთ-ერთ საკარანტინე სივრცეში იმყოფებოდა და „ცხელების ცენტრში“ გუშინ შემოიყვანეს", - განაცხადა პაპუნა ბახტაძემ.

მისივე თქმით, გუშინ ლუგარის ლაბორატორიაში ხუთი პირის ბიოლოგიური მასალა იყო საკვლევად გადაგზავნილი და კორონავირუსი, აქედან, მხოლოდ ერთს 84 წლის ქალს დაუდასტურდა.